Жаслар турмысын жаңа басқышқа көтериўге бағышланды

Усы жылдың 10-февраль күни Қарақалпақстан Республикасы Жоқарғы Кеңесинде жасларға тийисли мәмлекетлик сиясат тараўындағы жумыслардың, сондай-ақ, олар менен ислесиўдиң нәтийжелилигин арттырыў мәселесине бағышланған мәжилис болып өтти.

Жоқарғы Кеңес Баслығы М.Ерниязов басқарып барған мәжилисте Президентимиздиң өткен жылы 27-декабрь күни Муҳаммед ал-Хорезмий атындағы мектепте жаслар менен өткерген ушырасыўында белгилеп берилген ўазыйпалардың орынланыў барысы, жаслар менен алып барылып атырған жумыслардың нәтийжелилигин арттырыў бойынша мәселелер сөз етилди.

Республикамыз басшысы жаслардың бәнтлигин тәмийинлеў, олардың кәсип-өнер ийелеўи ҳәмде исбилерменлик пенен шуғылланыўы ушын барлық қолайлы шараятларды жаратыў, жеңиллетилген кредитлер бериў, сондай-ақ, талантлы жасларды қоллап-қуўатлаў бағдарындағы жумысларды және де күшейтиў илажлары бойынша тийисли тараў басшыларына тапсырмалар берди.

Сондай-ақ, мәжилисте Өзбекстан Республикасы Президентиниң Олий Мажлиске жоллаған Мүрәжатында жаслар мәселеси бойынша белгилеп берген ўазыйпалар, олардың турмысындағы машқалаларды шешиўге қаратылған системалы жумысларды әмелге асырыў бойынша да ўазыйпалар белгилеп алынды.