ХОШ ХАБАР: БҮГИН КОРОНАВИРУС ИНФЕКЦИЯСЫНАН САЎАЛҒАНЛАР САНЫ 8 АДАМҒА КӨБЕЙДИ!

Қарақалпақстан Республикасы жуқпалы кеселликлер емлеўханасынан 2-май күни коронавирусқа шалынған 8 наўқас саўалып шықты. Олар Қарақалпақстан Республикасы Жоқарғы Кеңеси, Денсаўлықты сақлаў министрлигиниң жуўапкер хызметкерлери қатнасында реабилитацияға жиберилди.

Өзбекстан Республикасы Денсаўлықты сақлаў министрлигиниң мағлыўматы бойынша, саўалғанлардың ҳәммеси Қарақалпақстаннан (Нөкис қаласынан – 7, Мойнақ районынан -1) болып, олар арасында ең жасы үлкени 65 жаста, ең кишиси 12 жаста.

Саўалып шыққан пуқаралар коронавирусқа шалынған наўқасларға көрсетип атырған итибар ҳәм ғамқорлығы, емлеўханада жаратылған шараятлар ушын Президентимизге шексиз миннетдаршылық билдирди. Жуқпалы кеселликлер емлеўханасы шыпакерлерине, бәрше медицина хызметкерлерине алғысын айтты.

Бүгинге дейин елимизде 62 наўқас емлеген болса, бүгин олардың қатарына және 8 адам қосылды ҳәм олардың саны жәми 70 адамға жетти.

Коронавирус инфекциясына шалынған пуқаралардан және бир топары жақын күнлерде пүткиллей саўалып шығыўы күтилмекте.

Қарақалпақстан Республикасы Жоқарғы Кеңесиниң баспасөз хызмети