Исбилерменлердиң мүрәжатлары шешилмекте

Қарақалпақстан Республикасы Жоқарғы Кеңесиниң Баслығы М.Ерниязов усы жылдың 30-май – 1-июнь күнлери қала ҳәм районлардың исбилерменлери менен видеоконференцбайланыс арқалы ушырасыўлар өткерген еди.

Исбилерменликти раўажландырыў, исбилерменлерди ҳәр тәреплеме қоллап-қуўатлаў, ойландырып атырған машқалаларды сапластырыў, мүрәжатларын унамлы шешип бериў, оларға қолайлы шараятлар жаратыў мақсетинде шөлкемлестирилген ушырасыўларда исбилерменлердиң мүрәжатлары тыңланып, олардың белгили бир бөлими орнында өз шешимин тапқан болса, қосымша үйрениў ҳәм ўақыт талап ететуғын мүрәжатлар бойынша жуўапкер басшыларға анық тапсырмалар белгилеп берилген еди.

Биз бүгинги күнде мүрәжатлары шешимин тапқан исбилерменлеримиздиң айырымлары менен сәўбетлестик:

– Жоқарғы Кеңес Баслығының исбилерменлер менен ушырасып, бизиң машқаламыз ҳәм  жумысымызға өзиниң  кери тәсирин тийгизетуғын айырым кемшиликлер хаққында мүрәжатымызды тыңлағаны бизлерди  қуўанышқа бөледи, – дейди Кегейли районы «Баймақлы Есемурат» ЖШЖ баслығы Есемурат Алжанов. – Видеоконференцияда мен  өз исбилерменлик ҳәрекетимди еле де  жетилистириў, нақ  пул айланысы менен бирге  пластик карта арқалы пул айланысларын жолға қойыў ушын Халық банки тәрепинен терминал алыўда жәрдем сораған едим. Бул мүрәжатым көп ўақытқа созылмай өзиниң унамлы шешимин тапты. Бүгин  Президентимиз, соның менен бирге  мәмлекетимиз ушын аянбай мийнет етип атырған барлық басшылардың исбилерменликти раўажландырыўды мақсет еткен заманласларымызға болған итибары ушын миннетдаршылық билдиремиз.

–Бозатаў районы қайта шɵлкемлестирилгеннен кейин районда шарўашылық тараўын раўажландырыў бойынша бир қанша ислер әмелге асырылмақта, – дейди Бозатаў районы “Абылов Байрамбай” фермер хожалығы баслығы Бектилеў Абылов. – Бирақ биз күткен нәтийжеге ерисиўимиз ушын жайлаў жерлер менен егислик жерлерди бабында суўғарыў талап етиледи. Сонлықтан, “Кусханатаў” аўыл пуқаралар жыйыны аймағында фермер хожалықларының егислик жерлерин, тазадан ашылатуғын жерлерди ҳәм жайлаў жерлерин суўғарыўда машқалалар пайда болмақта. Ушырасыўда Әмиўдәрья дәрьясынан Еркиндәрья каналына туўрыдан-туўры  суў жеткерип бериў ушын 5 куб қуўатлықтағы насос станциясын қурып бериўде әмелий жәрдем сорадық. Сондай-ақ, районымыз жаңадан шөлкемлестирилиўине байланыслы фермерлерге хызмет көрсетиўши машина трактор паркин ашыўға, аўыл хожалық техникаларын жанар май менен тәмийинлеў ушын май қуйыў шақапшасын ҳәмде шарўа азықлық егинлерин, палыз өнимлерин минерал төгин менен азықландырыў ушын агрохимия шақапшасын ашыўда әмелий жәрдем сорадық. Мүрәжатымыз үйренилип, унамлы шешимин таппақта.

– Қарақалпақстан Республикасы Жоқарғы Кеңесиниң Баслығы өткерген ушырасыўда  мен районлық Диагностика орайын кеңейтиӯ мақсетинде қосымша имарат ҳәм сырт елден медицина әсбап-үскенелерин сатып алыӯ ушын 1 миллиард сум муғдарында жеңиллестирилген кредит қаржыларын ажыратыӯда әмелий жәрдем сорап мүрәжат еттим, – дейди Шымбай районындағы “ПИНТОК” жеке меншик фирмасы  баслығы Рустем Даўлетмуратов. – Мениң мүрәжатым унамлы шешилди.

Қарақалпақстан Республикасы Жоқарғы Кеңесиниң баспасөз хызмети