Финляндия Траст фондына 1 миллион евро ажыратты

Финляндия Бирлескен Миллетлер Шөлкеминиң Аралбойы регионы ушын Инсан қәўипсизлиги бойынша көп тәреплеме шериклик тийкарында Траст фондына жаңа донор сыпатында 1 миллион евро ажыратты. Бул ҳаққында «Правда Востока» газетасының 2020-жыл 4-июнь күнги 117-санында хабар берилди.

Хабарда Финляндия ҳүкимети ҳәм Нью-Йорктағы Траст фонды мәкемеси (Траст фондының ҳәкимшилиги) 29-май күни Финляндия тәрепиниң Траст фондына 1 миллион евро муғдарындағы үлеси ҳаққында шәртнамаға қол қойғаны, қаржы ажыратыў ҳақкындағы қарар 2019-жыл ноябрьде Брюсселде өткен “Өзбекстан – Европа Аўқамы” бирге ислесиў Кеңесиниң 15-мәжилисинде Финляндия сыртқы ислер министри Пекка Хаависто тәрепинен жәрияланғаны айтылған.

Бул қаржы экологиялық, экономикалық қәўипсизлик, азық-аўқат қәўипсизлиги, халықтың денсаўлығын сақлаў, оны социаллық жақтан қорғаў, донор жәрдеминиң нәтийжесизлигин сапластырыў бағдарларында жумсалатуғыны жазылған.

Хабарда БМШ басшылығында Траст фонды 2018-жылы дүзилгени, Биринши сыртқы донор Норвегия мәмлекети 2019-жылы 1,1 миллион доллар ажыратқаны, 2020-жылдың март айында Европа Аўқамы фондтың жойбарларын қаржыландырыў ушын 5 миллион евро, Өзбекстан ҳүкимети 3,5 миллион доллар ажыратқаны атап өтилген.

Қарақалпақстан Республикасы Жоқарғы Кеңесиниң баспасөз хызмети