Әдил судлаўды тәмийинлеў – әҳмийетли ўазыйпамыз

Өзбекстан Республикасы Президенти Ш.Мирзиёев усы жылдың 30-июнь күни әдил судлаўды тәмийинлеў ҳәм коррупцияға қарсы гүресиў бағдарындағы ўазыйпаларды додалаўға бағышланып өткерилген видеоселектор мәжилисинде «Суд имаратына келген ҳәр бир инсан Өзбекстанда әдиллик бар екенлигине исенип шығып кетиўи керек» деп айрықша атап өткен еди.

Сонлықтан судлар ҳәм олардың жумысын оптималластырыў бойынша тапсырмалар берилип, буннан былай депутат ҳәм сенаторлар өзлери сайланған аймақларда судьялар корпусы, сектор басшылары ҳәм жәмийетшиликти тартқан ҳалда әдил судлаўға жәрдемлесиў ҳәм коррупцияға қарсы гүресиў бойынша турақлы сөйлесиў өткерип барыўы, Олий Мажлистеги арнаўлы комитетлер ҳәр бир аймақтың әдил судлаў ҳәм коррупция мәселелерине байланыслы рейтинги жүргизилиўине басшылық етип, ҳәр ярым жыллық нәтийжелери бойынша парламентлик тыңлаўларды ҳәм тексериўлерди өткерип барыў зәрүрлиги, халық тәрепинен көтерилген әдилсизлик жағдайлары ҳәм машқалалар ҳәр шеректе жергиликли кеңеслерде сын көзқарастан додаланып, жуўапкерлер алдына анық сораўлар қойылыў ҳәм жумысына баҳа берип барыў кереклиги белгиленген еди.

Усы жыл 4-июль күни Қарақалпақстан Республикасы Жоқарғы Кеңесиниң Нызамлылық, суд-ҳуқық ҳәм коррупцияға қарсы гүресиў мәселелери комитети менен Беруний, Елликқала ҳәм Төрткүл районлары халық депутатлары Кеңеслериниң Нызамлылықты тәмийинлеў ҳәм коррупцияға қарсы гүресиў мәселелери бойынша турақлы комиссияларының видеобайланыс арқалы қоспа мәжилиси болып өтти.

Мәжилисти Қарақалпақстан Республикасы Жоқарғы Кеңесиниң Нызамлылық, суд-ҳуқық ҳәм коррупцияға қарсы гүресиў мәселелери комитети баслығы З.Реймова алып барды ҳәм ҳүрметли Президентимиз тәрепинен белгиленген тапсырма ҳәм ўазыйпалардың өз ўақтында, сапалы орынланыўын тәмийинлеўде судьялардың жуўапкершилигин ҳәм белсендилигин арттырыў зәрүрлигин айрықша атап өтти.

Буннан соң күн тәртибиндеги мәселелер бойынша Беруний районы жынаят ислери бойынша судының баслығы З.Якубов, Беруний районлараралық экономикалық судының баслығы Б.Қытайбеков, Беруний районлараралық пуқаралық ислери бойынша судының баслығы Ж.Кеўнимжаев, Елликқала районы жынаят ислери бойынша судының баслығы О.Маўленов, Елликқала районы ҳәкимшилик судының баслығы Ж.Алланиязов, Төрткүл районы ҳәкимшилик судының баслығы Б.Досымбетов, Төрткүл районлық ишки ислер бөлиминиң баслығы З.Зайтов ҳәм Төрткүл районлық әдилллик бөлиминиң баслығы Д.Халмуратовлардың мәлимлемелери тыңланды.

Сондай-ақ, мәжилис қатнасыўшылары районлардағы Нызамлылықты тәмийинлеў ҳәм коррупцияға қарсы гүресиў мәселелери бойынша турақлы комиссияларының әдил судлаўды әмелге асырыў, жәмийетлик тәртипти сақлаў, жынаятшылық ҳәм ҳуқықбузарлықлардың алдын алыў бойынша алып барып атырған жумыслары ҳаққындағы мәлимлемелерин де тыңлады.

Мәжилисте Қарақалпақстан Республикасы Жоқарғы Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитетиниң баслығы Д.Қурбаниязов бүгинги күнде суд ҳәм ишки ислер уйымлары жумысларының ғалаба хабар қуралларында жарытылыўы жағдайы бойынша қызықтырған сораўларын берди.

Соның менен бирге, Қарақалпақстан Республикасы Жоқарғы Кеңесиниң депутатлары Х.Ешимбетов ҳәм Н.Матякубовалар көрилген мәселелер бойынша өз пикир-усынысларын билдирди.

Мәжилис соңында қаралған мәселелер бойынша тийисли қарар қабыл етилди.

Қарақалпақстан Республикасы Жоқарғы Кеңесиниң баспасөз хызмети