КОРРУПЦИЯҒА ҚАРСЫ ГҮРЕСИЎ ЎАЗЫЙПАЛАРЫ БЕЛГИЛЕНДИ

Қарақалпақстан Республикасы Жоқарғы Кеңесинде  Нызамлылық, суд-ҳуқық ҳәм коррупцияға қарсы гүресиў мәселелери комитетиниң 2020-жылдың екинши ярымына белгиленген илажлар жобасына муўапық, 27-октябрь күни видеоконференция тәризинде комитет мәжилиси болып өтти.

Илажға Халық депутатлары қалалық ҳәм районлық Кеңеслериниң Нызамлылық ҳәм коррупцияга қарсы гүресиў мәселелери бойынша турақлы комиссиялары баслықлары ҳәм ағзалары, ҳуқыққорғаў уйымлары, сондай-ақ, халық билимлендириў, халықтың бәнтлигине көмеклесиў орайы, медицина бирлеспелериниң басшы ҳәм жуўаплы хызметкерлери қатнасты.

Мәжилисти Қарақалпақстан Республикасы Жоқарғы Кеңесиниң Нызамлылық, суд-ҳуқық ҳәм коррупцияға қарсы гүресиў мәселелери комитетиниң баслығы З.Реймова ашты ҳәм Президентимиздиң басшылығында елимизде коррупцияға қарсы гүресиў, халықтың ҳуқықый санасын ҳәм ҳуқықый мәдениятын арттырыў бағдарында әмелге асырылып атырған кең көлемли илажларға тоқтап өтти.

Қарақалпақстан Республикасында коррупцияға қарсы гүресиў бағдарында әмелге асырылып атырған жумыслар ҳаққында Қарақалпақстан Республикасы Прокуратурасының шөлкемлескен жынаятшылық ҳәм коррупцияға қарсы гүресиў бөлиминиң баслығы М.Атаджановтың есабаты тыңланды.

Сондай-ақ, бул бағдарда мәкемелерде әмелге асырылып атырған жумыслардың барысын үйрениў бойынша дүзилген исши топардың мәлимлемеси де тыңланды. Үйрениў жуўмағы сын көз-қарастан талқыланып, анықланған кемшиликлерди сапластырыў бойынша тийисли тараў басшыларына тапсырмалар берилди.

Қатнасыўшылар өзлериниң пикир-усынысларын билдирип, қызықтырған сораўларына жуўаплар алды.

Комитет мәжилиси соңында күн тәртибиндеги қаралған мәселе бойынша тийисли қарар қабыл етилди.

Қарақалпақстан Республикасы Жоқарғы Кеңесиниң баспасөз хызмети