Халық депутатлары Нөкис қалалық Кеӊесиниӊ гезексиз он сегизинши сессиясы болып өтти

Усы жылдыӊ 6-ноябрь күни халық депутатлары Нөкис қалалық Кеңесиниң гезексиз он сегизинши сессиясы болып өтти.

Сессияның күн тəртибинде шөлкемлестириў мәселеси көрип шығылды.

Сессия жумысына Қарақалпақстан Республикасы Жоқарғы Кеңесиниӊ Баслығы М.Камалов қатнасты ҳәм шығып сөйледи.

Сессияда қаланы социаллық-экономикалық жақтан раўажландырыў, исбилерменликти қоллап-қуўатлаў, қаланыӊ инфраструктурасын, архитектуралық-мәдений келбетин жақсылаў, бүгингидей коронавирус пандемиясы шараятында халықтың саламатлығын қорғаў ҳәм турмыс абаданлығын жақсылаў, әсиресе «Темир дәптер», «Жаслар дәптери» ҳәм «Ҳаял-қызлар дәптери»н нәтийжели жүргизиў арқалы жәрдемге мүтәж ҳәм кем тәмийинленген шаңарақларды қоллап-қуўатлаў, ҳаял-қызлар ҳәм жаслардың ролин арттырыў және бәнтлигин тәмийинлеў бойынша алда турған ўазыйпаларға айрықша итибар қаратылды.

Сессияда усы күнге дейин «Титан цемент» ЖШЖ Өзбекстан – Қытай қоспа кәрханасы бас директоры, Нөкис қаласы «Титан ДСЗ» ЖШЖныӊ баслығы лаўазымларында ислеп келген Панаев Утемурат Бердимуратович Нөкис қаласы ҳәкими ўазыйпасын атқарыўшы етип тайынланды.

Өз гезегинде У.Панаев өзиниң бар билим ҳәм тәжирийбесин күннен-күнге шырай ашып баратырған Нөкис қаласын еле де гүллеп-раўажландырыўға, халықтың турмыс абаданлығын арттырыўға, пуқаралардыӊ мүрәжатларын тыӊлап, оларды унамлы шешиўге, исбилерменлерге қолайлы шараятлар жаратыўға, халықтыӊ, әсиресе, жаслар ҳәм ҳаял-қызлардыӊ бәнтлигин тәмийинлеўге жумсайтуғынлығын атап өтти.

Усыныӊ менен халық депутатлары Нөкис қалалық Кеңесиниң гезексиз он сегизинши сессиясы өз жумысын жуўмақлады.

Қарақалпақстан Республикасы Жоқарғы Кеңесиниң баспасөз хызмети