Сенат Баслығы Т.Нарбаева жаӊа жойбарлар менен танысты

Алдын хабар бергенимиздей, Өзбекстан Республикасы Олий Мажлиси Сенаты Баслығы Т.Нарбаева республикамызда хызмет сапарында болмақта.

Сапар даўамында Т.Нарбаева аймақты социалллық-экономикалық раўажлындырыўға қаратылған бир қатар перспективалы жойбарлар менен танысып бармақта.

13-ноябрь күни Сенат Баслығы Т.Нарбаева Шоманай, Хожели ҳәм Тақыятас районларында болып, Ҳүрметли Президентимиз тәрепинен белгилеп берилген тапсырмаларыныӊ орынланыўы бойынша әмелге асырылып атырған жумыслар менен танысты.

Дәслеп Т.Нарбаева Шоманай районындағы “SHomanay eco teks” жуўапкершилиги шекленген жәмийетинде болды. 21 миллион АҚШ доллары болған бул жойбар усы жылдыӊ март айында иске түсирилген. Бул жерге Швейцария, Япония, Түркиядан заманагөй үскенелер келтирилген. Нәтийжеде 480 жаӊа жумыс орны жаратылды. Бүгинги күнге шекем 4500 тонна өним Пакистан, Қытай Халық Республикасы, Түркия мәмлекетлерине экспорт етилди.

Буннан соӊ Т.Нарбаева райондағы “RANN-ОМАD” жуўапкершилиги шекленген жәмийетинде болды. Соны айрықша атап өтиўимиз тийис, бул кәрханаға 1 гектар майданда заманагөй теплица қурыў жойбары ушын 4,3 миллиард сўмлық кредит ажыратылған. Қубла Кореяныӊ “Myung Sung Placon” LTD  фирмасынан шәртнама тийкарында 500 мыӊ АҚШ доллары муғдарындағы кредит қаржысы есесине заманагөй үскенелер алып келинди.

Бул жойбар 2019-жыл январьда толық пайдаланыўға тапсырылды ҳәм 30 жаӊа жумыс орны жаратылды. Теплицада жылына 120 тонна қыяр өнимлери жетистирилип,  ишки базарды тәмийинлемекте. Келешекте жойбар және де кеӊейтилип, жәми 5 гектарға жеткериў режелестирилген. Сенат Баслығы усы жердиӊ өзинде ҳаял-қызлар менен сәўбетлесип, олардыӊ машқалалары менен қызықты.

Сондай-ақ, Сенат Баслығы Т.Нарбаева сектор басшылары ҳәм район белсендилери менен ушырасты.

Илажда Өзбекстан Республикасы Президенти Ш.Мирзиёев басшылығында 10-ноябрь күни болып өткен Қарақалпақстан Республикасын социаллық-экономикалық раўажландырыў мәселелери бойынша видеоселектор мәжилисинде, сондай-ақ, Президентимиз тәрепинен 2-октябрь күни Қарақалпақстан Республикасы Жоқарғы Кеӊесиниӊ гезексиз сессиясында белгилеп берген ўазыйпалардыӊ орынланыўы сөз етилди.

Бул жумысларды шөлкемлестириў ҳәм қадағалаў ушын Олий Мажлис Сенатында Аралбойы регионын раўажландырыў, халықтыӊ турмысын жақсылаў ҳәм дәраматларын арттырыў бойынша жаӊа комитет шөлкемлестирилгени атап өтилди.

Илаж қатнасыўшылары ҳәм депутатлар бул бойынша өзлериниӊ пикир-усынысларын билдирди.

Сондай-ақ, усы күни Сенат Баслығы Т.Нарбаева Хожели районындағы 1-санлы республикалық “Меҳрийбанлық үйи” тәрбияланыўшылары менен ушырасты ҳәм бул жерде жаратылған шараятлар менен жақыннан танысты.

Соныӊ менен бирге, Тақыятас районындағы “Nayman agro teplica” ЖШЖ тәрепинен жетистирилип атырған палыз өнимлерин,  сондай-ақ, аймақтағы “Atiyag gulzar” ЖШЖ тәрепинен ислеп шығарылып атырған ҳәм экспорт етилип атырған ун өнимлерин көзден өткерди.

Буннан тысқары, Т.Нарбаева район депутатлары менен ушырасты. “Сақаўат ҳәм көмек” улыўмахалық ҳәрекети шеӊберинде “Темир дәптер”ге киргизилген ҳәр бир шаӊарақты жумыс пенен тәмийинлеў бойынша әмелге асырылып атырған жумысларға да итибарын қаратты.

Өзбекстан Республикасы Олий Мажлиси Сенатыныӊ Баслығы Т.Нарбаеваныӊ республикамызға сапары даўам етпекте.

 Қарақалпақстан Республикасы Жоқарғы Кеӊесиниӊ Баспасөз хызмети

М.Ҳабибуллаевтыӊ түсирген сүўретлери