Сенат Баслығыныӊ қатнасыўында баспасөз конференциясы болып өтти

14-ноябрь күни Қарақалпақстан Республикасы Жоқарғы Кеӊесинде Өзбекстан Республикасы Гендер теӊликти тәмийинлеў мәселелери бойынша комиссиясыныӊ басламасы менен гендер теӊликти тәмийинлеў бойынша алып барылып атырған жумыслар, машқалалар ҳәм усынысларға бағышланған баспасөз конференциясы болып өтти.

Баспасөз конференциясына мәмлекетлик басқарыў уйымлары, жоқары оқыў орынларыныӊ басшылары ҳәмде ғалаба хабар қуралларыныӊ ўәкиллери қатнасты.

Илажда Өзбекстан Республикасы Олий Мажлиси Сенатыныӊ Баслығы – Гендер теӊликти тәмийинлеў мәселелери бойынша комиссиясыныӊ баслығы Т.Нарбаева елимизде бул бағдарда алып барылып атырған жумыслар ҳаққында айтып өтти.

Сондай-ақ, гендер теӊликти тәмийинлеў бойынша Қарақалпақстан Республикасында алып барылып атырған жумыслар кеӊнен додаланды. Соныӊ менен бирге, ҳаял-қызлар ҳәм ерлер ушын теӊ  ҳуқықларды, имканиятларды тәмийинлеў, әсиресе, ҳаяллар арасында жынаятшылықты кемейтиў, олардыӊ бәнтлигин тәмийинлеў, ҳуқықый саўатын арттырыў мәселелери ҳаққында да сөз етилди.

Ғалаба хабар қуралларыныӊ ўәкиллери өзлерин қызықтырған сораўлары менен мүрәжат етип, пикир-усынысларын да билдирип өтти.

Қарақалпақстан Республикасы Жоқарғы Кеӊесиниӊ баспасөз хызмети

М.Ҳабибуллаевтыӊ түсирген сүўретлери