Аўыл хожалығын раўажландырыў мәселеси додаланды

18-ноябрь күни Қарақалпақстан Республикасы Жоқарғы Кеңесиниң Аграр, суў хожалығы, тәбиятты қорғаў ҳәм экология мәселелери комитетиниң мәжлиси болып өтти.

Видеоконференц-байланыс тәризинде өткерилген мәжилисте Халық депутатлары районлық Кеңеслериниң аўыл хожалығы бойынша турақлы комиссиясы ағзалары, тийисли тараў қәнигелери қатнасты.

Қарақалпақстан Республикасы Жоқарғы Кеңесиниң Аграр, суў хожалығы, тәбиятты қорғаў ҳәм экология мәселелери комитетиниң баслығы Ш.Атаниязов Ҳүрметли Президентимиз Шавкат Мирзиёев тәрепинен усы жылдыӊ 2-октябрь күни Қарақалпақстан Республикасы Жоқарғы Кеңесиниң гезексиз сессиясында республикамызды социаллық-экономикалық раўажландырыў мәселелерине айрықша итибар қаратылып, бул бойынша әҳмийетли ўазыйпа ҳәм бағдарлар белгилеп берилгенин айрықша атап өтти.

Өзбекстан Республикасы Президентиниӊ 2020-жыл 11-ноябрьдеги «2020-2023-жылларда Қарақалпақстан Республикасын комплексли социаллық-экономикалық раўажландырыў илажлары ҳаққында»ғы қарары бул бағдардағы жумысларды нәтийжели әмелге асырыўда үлкен әҳмийетке ийе.

Қарарда аўыл хожалығын раўажландырыў, соның ишинде, шарўашылық, балықшылық, салыгершилик ҳәм гүнжи жетистириў және қайта ислеў кластерлерин шөлкемлестириў тараўында жер майданларында пахта жетистириўди қысқартырыў, пайдаланыўдан шыққан жер майданларын өзлестириў, аўыл хожалығының пайдаланыўына қайта киргизилетуғын жер майданларында ыссыханалар шөлкемлестириў, музлатқышлы қоймаханалардың қуўатлылығын, аўыл хожалығы техникаларының ҳәм  нәсилли қарамаллардың санын арттырыў, жер майданларында гүнжи жетистириў ҳәм өнимди толық экспортқа бағдарлаў, балық жетистириў көлемин арттырыў бир қатар жумысларды әмелге асырыў белгилеп берилген.

Мәжилисте Президентимиздиң Қарақалпақстан Республикасы Жоқарғы Кеңесиниң гезексиз сессиясында берген тапсырмаларын ҳәм қарарда белгиленген ўазыйпаларды орынлаў бойынша әмелге асырылып атырған жумыслар додаланды, бул бағдарда қолга киритилген нәтийжелер менен жол қойылып атырған қәте-кемшиликлер ҳаққында да сөз етилди.

Сондай-ақ, 2020-жылда аўыл хожалығы тараўын раўажландырыў бойынша инвестиция жойбарларының орынланыўы, аўыл хожалығы егинлериниң жайластырылыўы, жаңадан шөлкемлестирилген мийўе-палыз кластерлери тәрепинен бүгинги күнде әмелге асырылып атырған илажлар, оларға бириктирилген фермер хожалықлары тәрепинен жетистирилген өнимлердиң экспортқа шығарылыўы, аўыл хожалығы кәрханалары ҳәм фермер хожалықларына аўыл хожалығы техникаларының лизинг тийкарында жеткерип берилиўи мәселелери додаланды.

Сондай-ақ, мәжилис күн тәртибинен орын алған «Өсимликлер карантини ҳаққында»ғы Қарақалпақстан Республикасының Нызамының жаңа редакциядағы жойбары бойынша пикир ҳәм усыныслар билдирилди.

Қарақалпақстан Республикасы Жоқарғы Кеңесиниң баспасөз хызмети