Сенаторлар Тахтакөпир районында жойбарлардың орынланыўын үйренди

Олий Мажлис сенаторлары Б.Алиханов, О. Атаниязова 23-ноябрь куни Тахтакөпир районында болды ҳәм районлық Кеңес депутатлары, район белсендилери ҳәм жаслар менен ушырасыў өткерилди.

Президентимиздиң “2020-2023-жылларда Қарақалпақстан Республикасын комплексли социаллық-экономикалық раўажландырыў илажлары ҳаққында”ғы қарарының мазмунын түсиндириў менен бирге режелерди ўақтында иске асырыўдың әҳмийети, бул арқалы район халқының жағдайын жақсылаў атап өтилди. Районда әмелге асырылыўы күтилип отырған 54 жойбардың барысы додаланды ҳәм жетискенликлер менен кемшиликлер талқыланды.Ҳәр бир орынға барыў жолларын үйренип, анық жағдайын көрип шықты.

Ташкенттен шақыртылған жуўапкер банк басшыларына машқалалардың ўақтында шешилиўи тапсырылып, келеси күнге анық тапсырмалар берилди.

24-ноябрь күни орынларда жойбарлардың орынланыўы үйренилди ҳәм ҳәр бир жуўапкердиң есабы тыңланды. Топар ағзалары райондағы аўыллық 10-санлы мектеп пенен танысып, мектепте оқытыўшылар ҳәм оқыўшылар менен сәўбетлесиў өткерди. Реже тийкарында усы мектепти қәўендерликке алыў атап өтилди.

Тахтакөпир районы ҳәкимлиги мәлимлеме хызмети