Жойбарлар сенатор ҳәм депутат нәзеринде

2020-жыл 25-ноябрь күни Кегейли районына бириктирилген Өзбекстан Республикасы Олий Мажлиси Сенаты ағзасы Маҳмуд Парпиев ҳәм Қарақалпақстан Республикасы Жоқарғы Кеңесиниң комитет баслығы, депутат Даўытбай Қурбаниязов район ҳәкими Муратбай Абдиров пенен ушырасып, 2020-2022 жылларда Кегейли районында әмелге асырылатуғын жойбарлар менен танысты.

Ҳүрметли Президентимиз Шавкат Мирзиёев тәрепинен усы жылдыӊ 2-октябрь күни Қарақалпақстан Республикасы Жоқарғы Кеңесиниң гезексиз сессиясында республикамыздыӊ ҳәр бир қала ҳәм районын раўажландырыўға, халықтың турмысын жақсылаўға қаратылған әҳмийетли ўазыйпалардқ белгилеп берген еди.

Усы ўазыйпалардан келип шыққан ҳалда, Қарақалпақстанда барлық тараўларды жедел раўажландырыў бойынша алдағы 3 жылға арналған илажлар ислеп шығылды. Өзбекстан Республикасы Президенти тәрепинен 2020-жыл 11-ноябрьде «2020–2023-жылларда Қарақалпақстан Республикасын комплексли социаллық-экономикалық раўажландырыў илажлары ҳаққында»ғы қарары қабыл етилип, республикамызды комплексли социаллық-экономикалық раўажландырыўдыӊ әҳмийетли бағдарлары белгиленди.

Президентимиз Шавкат Мирзиёевтиң басшылығында 10-ноябрь күни Қарақалпақстан Республикасын социаллық-экономикалық раўажландырыў мәселелери бойынша өткерилген видеоселектор мәжилисинде Қарақалпақстанда жумысларды жаңа түрде шөлкемлестириў ҳәм қадағалаў системасы орнатылатуғынын айрықша атап өтти. Белгиленген ўазыйпалардыӊ өз мүддетлеринде, сапалы орынланыўын тәмийинлеў мақсетинде ҳәр бир қала, районға Өзбекстан Республикасы Олий Мажлиси сенаторлары ҳәм Қарақалпақстан Республикасы Жоқарғы Кеңеси депутатлары бириктирилип, олар районларды социал-экономикалық раўажландырыў бойынша әмелге асырылып атырған жумыслар менен таныспақта.

Қарақалпақстанды раўажландырыў бойынша 3 жыллық бағдарламада ҳәр бир районда 2 хызмет түри өзине тән «өсиў ноқаты» етип белгиленген болып, Кегейли районында мийўе-палыз өнимлерин жетистириў ҳәм қағаз ислеп шығарыў “драйвер” тараўы етип алынған еди.

Кегейли районына бириктирилген сенатор Маҳмуд Парпиев ҳәм депутат Даўытбай Қурбаниязов “Kegeyli qog`oz” кәрханасында болып, ол жердеги жумыслардың алып барылыў тәртиби, кәрхананың алдына қойған мақсетлери, ислеп шығарып атырған өнимлери менен танысты. Буннан соң райондағы жойбар баҳасы 6,0 млн АҚШ долларына тең болған, боян тамырын қайта ислеп шығарыўды жолға қойған “LANKO MIYA” МЧЖ ҚК да болды. Ол жердеги жумысшылар ис-ҳақысын көтериў мәселесине айрықша тоқтап өтилди. Сондай-ақ, үйрениў барысында басқа да исбилерменлердиң кредит алыў, жойбарларды пуқта ҳүжжетлестириў мәселелерине итибар қаратылды.

Кегейли районы ҳәкимлиги Мәлимлеме хызмети