Социаллық тараўдағы жетискенликлер менен машқалалар додаланды

Бүгин Қарақалпақстан Республикасы Жоқарғы Кеңесинде Өзбекстан Республикасы Олий Мажлиси Сенаты ағзалары қатнасыўында елимизде социаллық инфраструктураны раўажландырыў мәселелерине бағышланған ушырасыў болып өтти.

Ушырасыўда Олий Мажлис Сенатының Илим-пән, билимлендириў хәм денсаўлықты сақлаў мәселелери ҳәмде Аралбойы регионын раўажландырыў мәселелери комитетлериниң ўәкиллери, Қарақалпақстан Республикасы Денсаўлықты сақлаў, Мектепке шекемги билимлендириў, Халық билимлендириў министрликлери ҳәм жоқары оқыў орынлары басшылары қатнасты.

Ушырасыўды Қарақалпақстан Республикасы Жоқарғы Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитети баслығы Д.Қурбаниязов ашты ҳәм басқарып барды.

Өзбекстан Республикасы Олий Мажлиси Сенатының Илим-пән, билимлендириў хәм денсаўлықты сақлаў мәселелери комитети баслығы О.Иминов, комитет баслығының орынбасары М.Парпиев, Аралбойы регионын раўажландырыў мәселелери комитети баслығының орынбасары Б.Матмуратов усы жылдыӊ 2-октябрь күни Ҳүрметли Президентимиз елимизге сапары даўамында республикамызды социаллық-экономикалық раўажландырыў мәселелерине айрықша итибар қаратып, келеси 3 жылға арналған 10 баслы бағдарды белгилеп бергенин, усы бағдарлар тийкарында Президентимиздиң арнаўлы қарары қабыл етилип, үш жыллық раўажланыў бағдарламасы ислеп шығылғанын, соныӊ ишинде социаллық инфраструктураны раўажландырыўға да айрықша итибар қаратылғанын атап өтти.

Елимизде 2020-2020-жылларда социаллық инфраструктураны раўажландырыў тараўында 21 мәмлекетлик мектепке шекемги билимлендириў шөлкеми, 400  шаңарақлық мектепке шекемги билимлендириў шөлкеминиң имаратларын қурыў, 55 ин  реконструкциялаў ҳәм толық оңлаў, 20 мектепке шекемги билимлендириў шөлкемин мәмлекетлик-жеке меншик шериклик тийкарында шөлкемлестириў, 7 улыўма орта билимлендириў мектебин қурыў, 101 мектепти реконструкциялаў ҳәм толық оңлаў, сол тийкарда улыўма орта билим бериў мектеплеринде оқыўшы орнының коэффициенти 1,1 проценттен  артып кетпеўин тәмийинлеў, 32 медициналық мәкемени  қурыў, реконструкциялаў және жеке меншик медицина шөлкемлерин шөлкемлестириў, сол тийкарда медицина мәкемелериниң қабыл етиў қуўатлылығын 20,4 мыңға,  орынлар санын 7,1 мыңға жеткериў, 21  мәденият объектлерин қурыў ҳәм реконструкциялаў, сол тийкарда  халыққа мәдений хызмет көрсетиўдиң  сапасын жақсылаў, олардың мәдений талапларын қанаатландырыў ҳәм бос ўақтының мазмунлы өтиўин тәмийинлеў белгиленген.

 

Сондай-ақ, 181  мектепти «Бир миллион программист» жойбарына киргизиў ҳәм 3 мыңнан аслам жасларды компьютерде программаластырыў тийкарларына үйретиў арқалы  санлы технологиялар бағдарында  жетик қәнигелерди таярлаў, оларға керекли билим ҳәм көнликпелерди бериў, 39  спорт объектин қурыў, реконструкциялаў, қосымша 83 мың халық ҳәм жаслардың спорт пенен шуғылланыўы ушын шараятлар жаратыў, сол тийкарда  жаслар арасында денетәрбия ҳәм спортты ғалаба ен жайдырыў нәзерде тутылған.

Бул йигиликлик ислер барлық тараўлар қатарында елимизде социаллық тараўларды раўажландырыўда жаӊа дәўирди баслап береди.

Президентимиз Шавкат Мирзиёевтиң басшылығында 10-ноябрь күни Қарақалпақстан Республикасын социаллық-экономикалық раўажландырыў мәселелери бойынша өткерилген видеоселектор мәжилисинде белгилеб берилген ўазыйпалардан келип шыққан ҳалда жойбарлардың өз мүддетлеринде, сапалы орынланыўын тәмийинлеў мақсетинде ҳәр бир қала, районға Өзбекстан Республикасы Олий Мажлиси сенаторлары ҳәм Қарақалпақстан Республикасы Жоқарғы Кеңеси депутатлары бириктирилип, олар районларды социаллық-экономикалық раўажландырыў бойынша әмелге асырылып атырған жумыслар менен таныспақта.

 

 

Ушырасыўда сенаторлар үйрениўлер нәтийжесинде социаллық тараўларда әмелге асырылып атырған жумыслар, жетискенликлер менен машқалалар, келешектеги жойбарларға тоқталып, бул бойынша анықланған қәте-кемшиликлерди сынға алды, оларды сапластырыў бойынша усынысларын билдирип, министрлик ҳәм жоқары оқыў орынларының басшылары менен өзара пикир алмасты.

Қарақалпақстан Республикасы Жоқарғы Кеңесиниң баспасөз хызмети