Саламат турмыс тәризин енгизиў дәўир талабы

Ҳәммемизге белгили болғанындай 2020-жыл дүнья жүзи ушын аңсат жыл болғаны жоқ. Дүнья жүзинде коронавирус пандемиясының жүзеге келиўи дүнья мәмлекетлери қатары Өзбекстанда да халықтың ден саўлығы, саламат турмыс тәризиниң төмен жағдайда екенлигин көрсетти.

Коронавирус инфекциясы ең алды менен жүрек-қан тамыр, дем алыў жоллары ҳәмде семизлик (артықша салмақ)  пенен  кеселленген пуқараларымыздың денсаўлығына унамсыз тәсир көрсетеди. Өзлеримиз гүўасы болғанымыздай, артықша салмаққа ийе, қант кеселлиги, жүрек ишемик кеселлиги ҳәм қан қойыўласыўы менен кеселленген инсанлар COVID – 19  кеселлигиниң биринши қурбанлары болды.

Ҳәммемиз буннан тийисли  жуўмақ  шығарған ҳалда зыянлы әдетлерден  ўаз  кешип  ғалабалық  спорт  пенен  турақлы шуғылланыў, дурыс аўқатланыў   нормаларына әмел кылыў, атап айтқанда қурамында дуз, қант, май муғдары көп болған ҳәмде қамырлы аўқатлар, мазалы затларды, нан өнимлерин нормадан артық жемесликти, бир сөз бенен айтқанда саламат турмыс тәризин күнделик турмысымызға айландырыўымыз зәрүр екенлиги бүгинги дәўирдиң өзи көрсетпекте.

Мине усы машқалалар өз ўақтында ҳәм дурыс үйренилип шығылып ҳүрметли Президентимиздиң 2020-жыл 30-октябрдеги “Саламат турмыс тәризин кең түрде үгит-нәсиятлаў ҳәмде ғалабалық спортты және де раўажландырыў ис-илажлары ҳаққында”ғы ПФ-6099 санлы Пәрманы туўры қабыл етилгенлиги бийкарға емес.

Дене тәрбия ҳәм ғалабалық спорт пенен турақлы шуғылланыў ҳәмде саламат турмыс тәризи бойынша турмыслық көнликпелерди қәлиплестириў арқалы ҳәр бир пуқарада  кеселликке қарсы күшли иммун системасы пайда болыўын тәмийинлеў, зыянлы әдетлерден ўаз кешиў, дурыс аўқатланыў нормаларына әмел етиў, тиклеў ҳәм реабилитация  жумыслары ҳәм ғалабалық физикалық активлик илажларын системалы ҳәм нәтийжели шөлкемлестириў, бул бойынша тийисли инфрасистема  ҳәм басқа зәрүрли шәрт-шараятлар жаратылмақта.

Атап айтқанда район ҳәм қала орайларында пияда ҳәм велосипедте жүриў ушын “Саламатлық жолақша”лары қурылыўы режелестирилмекте. Саламат турмыс тәризи платформасы арқалы бир күнде он мың ҳәм оннан артық адым жүрген шахстың электрон есап бетине 3000 сум, бир айда бир мәрте район бойынша ең көп жүрген шахсқа 300 мың сум, аймақлар бойынша ең көп жүрген шахсқа 500 мың сум, Өзбекстан Республикасы бойынша ең көп жүрген шахсқа 1 миллион сум муғдарында қаржылай хошаметлеўдиң режелестирилгенлиги бул әлбетте халқымызды қоллап-қуўатлаўдың ең алды үлгиси деп түсинемиз.

Ҳәзирги ўақытта соның менен бирге халықты спортқа кызықтырыў, олар арасында артықша салмақтың пайда болыўының алдын алыў, ҳәрекетшеңликке ийтермелеў ушын ғалаба хабар қуралларында спорт ҳәм саламатлықты үгит-нәсиятлаўшы көрсетиўлер турақлы көрсетилип барылмақта.

Биз сизлерден өзлериңиздиң денсаўлығыңызға  қатты  итибарлы болып,  артықша салмақтың пайда болыўының алды алынып, дене тәрбия ҳәм спорт пенен турақлы түрде шуғылланып барылса келешекте ҳәр қыйлы кеселликлердиң жүзеге келиўиниң алды алынған болар еди.

Себеби  ҳәмийше ҳәрекетте болған инсан ҳеш ўақытта аўырмай, ҳәмийше жас шаққан ҳәм куўнақ болып жүреди.


Азамат Турданов,
Нөкис қәнигелестирилген олимпия резервлери мектеп-интернаты директоры,
Халық депутатлары Нөкис қалалық Кеңесиндеги  ӨзЛиДеП депутатлық топары ағзасы