Қарардыӊ орынланыўы додаланды

2021-жылдың 7-январь күни Қарақалпақстан Республикасы Жоқарғы Кеңесинде Өзбекстан Республикасы Президентиниң 2020-жыл 11-ноябрьдеги «2020-2023-жылларда Қарақалпақстан Республикасын комплексли социаллық-экономикалық раўажландырыў илажлары ҳаққында»ғы ПҚ-4889-санлы қарарында белгиленген ўазыйпалардың орынланыўы бойынша әмелге асырылып атырған жумыслар ҳәм тийисли министрлик ҳәм шөлкемлердиң жумысының аналитикалық додаланыўына бағышланған мәжилис болып өтти.

Мәжилисте Өзбекстан Республикасы Олий Мажлиси Сенатының Аралбойы аймағын раўажландырыў мәселелелери бойынша комитетиниң баслығы Б.Алиханов, оның орынбасары Б.Матмуратов, Олий Мажлис Нызамшылық палатасының депутаты Л.Сейтова, Қарақалпақстан Республикасы Жоқарғы Кеңеси Баслығының орынбасары А.Давлетов, Олий Мажлис Сенаты ағзалары, Қарақалпақстан Республикасының қала ҳәм районларына бириктирилген министрлик ҳәм мәкемелер, коммерциялық банклер ўәкиллери, Қарақалпақстан Республикасы Жоқарғы Кеңесиниң депутатлары, қала ҳәм район штабларына бириктирилген жуўапкерлер ҳәмде ғалаба хабар қураллары ўәкиллери қатнасты.

Мәжилисти Қарақалпақстан Республикасы Жоқарғы Кеңеси Баслығының орынбасары А.Давлетов кирис сөз бенен ашты.

Атап өтилгениндей, соңғы жылларда Президентимиз тәрепинен Арал теңизиниң қурыўы нәтийжесинде аймақта жүзеге келген социаллық-экономикалық хәм экологиялық машқалаларды сапластырыўға айрықша итибар қаратылмақта, «2020-2023-жылларда Қарақалпақстан Республикасын комплексли социаллық-экономикалық раўажландырыў илажлары ҳаққында»ғы Өзбекстан Республикасы Президентиниң қарары да бул бағдардағы әҳмийетли тарийхый қәдем болып есапланады.

Мәжилисте қарар менен тастыйықланған бағдарламаның орынланыўы үстинен Парламент қадағалаўын шөлкемлестириў мақсетинде Аралбойы аймағын раўажландырыў мәселелери комитети тәрепинен Сенат ағзалары менен биргеликте аймақларда аналитикалық үйрениўлер турақлы түрде өткерилип атырғанлығы, үйрениўлер процессинде тек ғана қадағалаў илажлары әмелге асырылып қоймастан, ал, исбилерменлер ҳәм халық белсендилери менен ушырасыўлар шөлкемлестирилип, олардың машқалаларын орнында шешиў илажлары көрилип атырғанлығы атап өтилди.

Мәжилис күн тәртибинде қарардың орынланыўын тәмийинлеў, усы қарар менен тастыйықланған бағдарламаға киргизилген инвестициялық жойбарлардың өз мүддетлеринде ҳәм сапалы орынланыўын қадағалаў кереклиги сөз етилди.

Атап айтқанда, перспективасыз деп табылған жойбарларды иске түсириў ушын көрилген илажлар ҳәм олардың перспективасыз деп табылыўының себеплерин ҳәмде факторларын анықлаў, перспективасыз деп табылған жойбарлардың орнына усынылып атырған перспективалы жойбарлардың техникалық ҳәм экономикалық жақтан тийкарланғаны, терең талланғанлығы (басламашының имканиятлары, қаржыландырыў дереги, инфраструктураға ийе екенлиги) ҳәмде келешекте ҳақыйқаттан оларды әмелге асырыў ушын толық имканиятқа ийе екенлиги, 2020-жыл жуўмағы бойынша белгиленген мүддетинде иске түсирилмеген жойбарлардың кешиктирилгенлигиниң, банк кредити есабынан иске түсирилиўи керек болған жойбарларға кредит қаржыларының ажыратылмағанлығының, жойбарлардың мүддетиниң узайттырылыўының себеплери, 2021-жылдың I шерегинде иске түсирилиўи белгиленген жойбарлардың ҳалаты бойынша мағлыўмат, усыныс ҳәм машқалалар бойынша бириктирилген министрлик ҳәм мәкемелер, банклер, район ҳәкими орынбасарларының есабатлары тыңланды. Сондай-ақ, қала ҳәм районлардағы шараяты аўыр 45 мәҳәлле ҳәм аўылда халықтың турмыс шараятын жақсылаў, аймақларды абаданластырыў бойынша Жоқарғы Кеңес ҳәм жергиликли Кеңеслер депутатларының парламент қадағалаўын алып барыўы бойынша жумысы талланды ҳәм ҳәр тәрепилеме додаланды.

Мәжилисте көрилген ҳәр бир мәселе сын көз-қарастан талланып, усы мәселелерди өз ўақтында әмелге асырыў бойынша тийисли министрлик ҳәм мәкемелер, коммерциялық банклердиң ўазыйпалары белгилеп берилди, машқалаларды сапластырыў бойынша пикир ҳәм усыныслар билдирилди.

Қарақалпақстан Республикасы Жоқарғы Кеңесиниң баспасөз хызмети,

М.Ҳабибуллаев түсирген сүўретлер