Сессияда Президентимиздиң Олий Мажлиске Мүрәжатында белгиленген тийкарғы ўазыйпалар додаланды

12-январь күни Халық депутатлары Мойнақ районлық Кеңесиниң жигирмаланшы сессиясы болып өтти.

Бүгин Мойнақ районы ҳәкимлигиниң мәжилислер залында Халық депутатлары Мойнақ районлық Кеңесиниң жигирмаланшы сессиясы болып өтти. Илажды Мойнақ районы ҳәкими, Халық депутатлары Мойнақ районлық Кеңеси баслығы Е.Еденбаев ашты ҳәм алып барды.

Сессияға Олий Мажлис Сенаты ағзасы, Қарақалпақстан Республикасы Жоқарғы Кеңеси депутаты У.Жалменов, Қарақалпақстан Республикасы Жоқарғы Кеңеси депутаты Р.Мамбеткадиров,
район ҳәкиминиң орынбасарлары, халық депутатлары районлық Кеңес депутатлары, райондағы кәрхана, мәкемелердиң, пуқаралар жыйынларының баслықлары ҳәм ғалаба хабар қураллары ўәкиллери қатнасты.

Сессия күн тәртибинде:

Өзбекстан Республикасы Президенти Ш.М.Мирзиёевтың 2020-жыл 29-декабрь сәнесинде Олий Мажлиске жоллаған Мүрәжаты мазмунын жеткериў ҳәм белгилеп берилген тийкарғы ўазыйпалардан келип шыққан ҳалда бағдарламаларды таярлаў;

Мойнақ районы бойынша аўыл хожалығы ушын мөлшерленбеген жерлерге бирден-бир муғдарда белгиленген базалық салық ставкаларына киритилип атырған кемейттириўши ҳәм арттырыўшы коэффицентлерди қолланыў;

Мойнақ районында “Жаслар дәптери”не киргизилген жасларды кәсип-өнерге үйретиў, олардың бәнтлигин тәмийинлеў, исбилерменлик бойынша усынысларын қоллап-қуўатлаў, социаллық қорғалыўын күшейттириў ҳәм машқалаларын шешиў бойынша ис-илажларды әмелге асырыў;

Халық депутатлары Мойнақ районлық Кеңесиниң секретариат баслығын тайынлаў ҳаққында мәселелер киргизилди.

Халық депутатлары Мойнақ районлық Кеңеси баслығы Е.Еденбаев күн тәртибиндеги мәселелер менен таныстырып болғаннан соң, Қарақалпақстан Республикасы Кәсиплик аўқамлары шөлкемлери бирлеспеси Кеңеси баслығы, Өзбекстан Республикасы Сенат ағзасы У.Жалменов Өзбекстан Республикасы Президенти Ш.М.Мирзиёевтың 2020-жыл 29-декабрь сәнесинде Олий Мажлиске жоллаған Мүрәжаты мазмунын кең түрде баян етти.

Илажда күн тәртибиндеги басқа да мәселелер бойынша тийисли тараў қәнигелери сөзге шықты. Сондай-ақ, Халық депутатлары Мойнақ районлық Кеңесиниң секретариат баслығы етип Халық депутатлары Мойнақ районлық Кеңесиниң Шағырлы саўлаў округының депутаты К.Насырова тайынланды.

Күн тәртибиндеги мәселелер бойынша депутатлар өзлериниң пикир ҳәм усынысларын билдирди. Соң көрилген маселелер бойынша районлық Кеңес депутатлары тәрепинен тийисли қарарлар қабыл етилди.

Мойнақ районы ҳәкимлиги Мәлимлеме хызмети