Депутатлар қарар орынланыўыныӊ барысы менен танысты

Президентимиздиң 2020-жыл 11-ноябрьдеги «2020-2023-жылларда Қарақалпақстан Республикасын комплексли социаллық-экономикалық раўажландырыў илажлары ҳаққында»ғы қарарында бир қатар инвестициялық жойбарларды әмелге асырыў менен бирге республикамызда шараяты аўыр мәҳәлле ҳәм аўылларда халықтың турмыс шараятын жақсылаў, аймақларды абаданластырыў бойынша да бир қатар ўазыйпалар белгилеп берилген.

Қарардың орынланыўын тәмийинлеў мақстетинде Өзбекстан Республикасы Олий Мажлис Сенаты ағзалары, Қарақалпақстан Республикасы Жоқарғы Кеңесиниң депутатлары аймақларға барып, халықтың турмыс шараятларын жақсылаў бойынша алып барылып атырған жумысларды системалы түрде үйренип бармақта.

Қарақалпақстан Республикасы Жоқарғы Кеңесиниң комитет баслығы, депутат Д.Қурбаниязов Кегейли районында болып, усы ўазыйпалардың орынланыўының барысы менен танысты.

Дәслеп депутат “Гүжим терек” мәкан пуқаралар жыйынында тийисли тараў басшылары менен бирге районда иске түсирилиўи белгиленген жойбарлар бойынша пикирлести ҳәм алдағы ўазыйпалар белгилеп алынды.

Буннан соң “Қумшүӊгил” аўыл пуқаралар жыйыны мәкемесиниң бүгинги күндеги жағдайы көзден өткерилди.

Қарар бойынша Кегейли районындағы шараяты аўыр мәҳәлле ҳәм аўылларда халықтың турмыс шараятын жақсылаў, аймақларды абаданластырыў бойынша бир қатар жойбарлардың әмелге асырылыўы режелестирилген болып, бүгинги күнде қарар орынланыўын тәмийинлеў бойынша жумыслар алып барылмақта.

 Атап айтқанда, “Гүжим терек” МПЖ аймағындағы 304-санлы трансформатор пунктине қосымша жаңадан 160 кВА қуўатлылықтағы 1 дана, сондай-ақ “Қумшүӊгил” АПЖ аймағындағы 131-санлы трансформатор пунктине қосымша жаңадан 250 кВА қуўатлылықтағы 1 дана трансформатор пункти орнатылды. Ҳәзирги ўақытта 10/0,4 кВ ҳаўа линияларын тартыў жумыслары алып барылмақта.

Буннан тысқары Д.Қурбаниязов “Гүжим терек” мәкан пуқаралар жыйыны турғынлары менен де ушырасып, халықтың жасаў шараятларын үйренди ҳәм олар менен сәўбетлесип, машқалаларын тыңлады. Сондай-ақ 22-санлы улыўма билим бериў мектебиниӊ оқыў процеси, оқыўшылар ушын жаратылған шараятлар менен де танысты.

Жоқарғы Кеңес комитет баслығы, депутат З.Реймова ҳәм депутат Қ.Баймуратов Әмиўдәрья районы “Шардара” мәкан пуқаралар жыйынында тийисли тараў басшылары менен бирге қарарда белгиленген ўазыйпалардың орынланыўы бойынша алып барылып атырған жумысларды додалады. Додалаў даўамында әмелге асырылып атырған жумыслардың кемшиликлери айтылып, тийисли тапсырмалар берилди.

Бүгинги күнде “Шардара” МПЖ мәкемесинде жумыс алып барып атырған қәнигелерге қолайлық жаратыў мақсетинде кондиционер орнатып берилди. МПЖ мәкемесин 2021-жылы жергиликли бюджет есабынан реконструкция етиў ҳәм керекли инвентарьлар менен тәмийинлеў режелестирилген.

Сондай-ақ, мәкан пуқаралар жыйыны аймағында 2021-жылда 3 балалар майданшасын қурыў режелестирилген болып, 1 майданша пайдаланыўға тапсырылды. Аймақтағы 657 үйге заманагөй электрон газ есаплағышларын  орнатыў белгиленген болып, бул бойынша жумыслар алып барылмақта.

Мәкан пуқаралар жыйыны аймағында саўда ҳәм ислеп шығарыў жумысын әмелге асырыў бойынша исбилерменлик субъектлерин шөлкемлестириў бойынша 96 исбилерменге жер ажыратылды.

Соның менен бирге, депутатлар “Шардара” МПЖ да жасаўшы бир қатар исбилермен ҳәм басламашылар менен ушырасып, өз бизнесин жолға қойыў арқалы қосымша жумыс орын жаратыў ҳәм пуқаралардың бәнтлигин тәмийинлеў мәселесин додалады.

Депутатлар райондағы “Намуна” МПЖ ҳәм “Қыпшақ” АПЖда болып, әмелге асырылып атырған жумыслар менен танысты.

Қарақалпақстан Республикасы Жоқарғы Кеңесиниң баспасөз хызмети