Фракция есабаты тыңланды

27-февраль күни Өзбекстан Халық демократиялық партиясының Қарақалпақстан Республикасы Жоқарғы Кеңесиндеги фракциясының 2020-жылда әмелге асырған жумыслары ҳаққындағы есабат мәжилиси болып өтти.

Мәжилисти Қарақалпақстан Республикасы Жоқарғы Кеңеси Баслығының орынбасары А.Давлетов кирис сөз бенен ашып берди.

Атап өтилгениндей, депутатлардың жүзеге келген машқалалы мәселелерди шешиўинде, пуқаралардың ҳуқық ҳәм нызам менен қорғалатуғын мәплерин қорғаўында, депутатлық қадағалаўды орнатыўында фракцияның орны айрықша әҳмийетке ийе.

Сиясий партиялардың Жоқарғы Кеңестеги фракциясы Жоқарғы Кеңес сессиясында додаланып атырған мәселелерди көрип шығыў ҳәм мазмуны бойынша усыныслар ҳәмде пикирлер киритиў, мәмлекетлик ҳәкимият ҳәм басқарыў уйымларының лаўазымлы шахсларына олардың ўәкиллигине киргизилген мәселелер бойынша тийкарланған түсиндириўлер алыў, Жоқарғы Кеңесте додаланып атырған нызам жойбарлары ҳәм басқа да қарарлардың жойбарлары бойынша өз усынысларын киргизиў, ҳүкимет ағзаларын олардың жумысы мәселелери бойынша тыңлаў ҳаққында мәселе қойыў, фракцияның жумысы ушын зәрүрли материаллар ҳәм ҳүжжетлерди мәмлекетлик уйымлар ҳәмде олардың лаўазымлы шахсларынан талап етип алыў ҳәмде нызам ҳүжжетлерине муўапық басқа да ўәкилликлерге ийе.

Өзбекстан Халық демократиялық партиясының Қарақалпақстан Республикасы Жоқарғы Кеңесиндеги фракциясы ағзалары да өз ўәкиллиги шеңберинде мәмлекетимизде әмелге асырылып атырған кең көлемли реформаларда белсене қатнасыўға ҳәрекет етип келмекте.

2020-жыл даўамында фракция ағзалары бир қатар нызам жойбарлары ҳәм концепцияларын ислеп шығыўда белсене қатнасты. Буннан тысқары, өткен жылғы пандемия дәўиринде фракция ағзалары менен жалғыз кекселерге, бағыўшысын жоғалтқан шаңаракларға, майыплығы болған шахсларға, алыс аймақта жасайтуғын жәрдемге мүтәж шаңарақларға азық-аўқатлық өнимлер, гигиеналық қураллар ҳәм дәри-дәрмақлар жеткерип бериў ҳәмде карантин қағыйдаларына бойсыныў үстинен жәмийетлик қадағалаўды орнатыўда белсендилик көрсетти.

Сондай-ақ, фракция ағзалары тәрепинен бир қатар кемшиликлерге де жол қойылып атырғанлығы сынға алынды ҳәм оларды сапластырыў ҳәмде депутатлардың белсендилигин еледе арттырыў бойынша усыныслар берилди.

Мәжилисте Өзбекстан Халық демократиялық партиясының Қарақалпақстан Республикасы Жоқарғы Кеңесиндеги фракциясының баслығы, депутат Х.Ешимбетовтың фракция тәрепинен 2020-жылда әмелге асырылған жумыслар ҳаққындағы есабаты тыңланды.

Мәжилис күн тәртибиндеги мәселе бойынша пикир-усыныслар тыңланды ҳәм тийисли қарар қабыл етилди.

М.Ҳабибуллаев түсирген сүўретлер