Шымбай районында қырғызстанлы исбилерменлер менен қоспа кәрхана шөлкемлестириледи

Усы жылдың 11 март күни Өзбекстан – Қырғызстан бизнес форумы ҳәм Исбилерменлер кеңесиниң биринши мәжилиси өткерилип, онда 20 ға жақын ҳүжжетке қол қойылды.

Форум даўамында 20 дан аслам тараўда жумыс алып барып атырған исбилерменлер өз өнимлерин ҳам хызметлерин бирге ислесиў нийетинде болған шериклерге көрсетип, өз жумысының абзаллық ҳәм әҳмийетли тәреплери бойынша пикир алмасты.

Исбилерменлер кеңеси мәжилиси соңында аўыл хожалығы, қурылыс, туризм, логистика, хызмет көрсетиў ҳәмде тоқымашылық тараўларының 10 нан аслам бағдарында жумыс алып барып атырған исбилерменлер ортасында қызғын сөйлесиўлер алып барылып, бир қатар бирге ислесиў ҳаққындағы келисимлерге қол қойылды.

Бизнес-форумда Қарақалпақстан Республикасы Жоқарғы Кеңесиниң депутаты, “Шымбай дән” жуўапкершилиги шекленген жәмийетиниң баслығы К.Қадиров Қырғызстан импортерлары ҳәм экспортерлары ассоциациясының баслығы Л.Ниязбекова менен бирге аўыл хожалығы өнимлерин ислеп шығарыў ҳәм  шарўашылықты раўажландырыў, сондай-ақ оларды импорт-экспорт етиўге қәнигелестирилген “Агро Пром Холдинг” қоспа кәрханасын шөлкемлестириў бойынша 10 миллион долларлық келисимге қол қойды.

Қарақалпақстан Республикасы Жоқарғы Кеңесиниң баспасөз хызмети