Депутат жаза мүддетин өтеп атырған шахслардың мүрәжатларын тыңлады

Өзбекстан Республикасы Олий Мажлисиниң Инсан ҳуқықлары бойынша Қарақалпақстан Республикасы аймақлық ўәкили (Омбудсман), Қарақалпақстан Республикасы Жоқарғы Кеңесиниң комитет баслығы, депутат З.Реймова Наўрыз улыўмахалықлық байрамы мүнәсибети менен Қоңырат районында жайласқан Қарақалпақстан Республикасы Ишки ислер министрлигине қараслы жазаны өтеў колониясында жаза мүддетин өтеп атырған шахслар менен ушырасты.

Ушырасыўды колония баслығы, подполковник С.Авезов ашты ҳәм басқарып барды.

Ушырасыўда З.Реймова жаза мүддетин өтеп атырғаншахсларды байрам менен қутлықлап, Өзбекстан Республикасы Олий Мажлисиниң Инсан ҳуқықлары бойынша аймақлық ўәкиллери (Омбудсман) тәрепинен бир қатар жазаны өтеў колониялары үйренилип, ол жерде жаза мүддетин өтеп атырған шахслардың ҳуқық ҳәм еркинликлерин тәмийинлеўге итибар қаратылып атырғанлығын атап өтти.

Илажда жақсы минези менен басқаларға үлги, мийнетке ҳәм тәртип-интизамға ҳүжданлы түрде мүнәсибетте болған, тәрбиялық илажларды өткериўде белсене қатнасқан бир топар жаза мүддетин өтеп атырған шахсларлар хошаметленди ҳәм олардың интизамый жаза шарасы мүддетинен алдын алып тасланды.

Сондай-ақ, Өзбекстан Республикасы Олий Мажлисиниң Инсан ҳуқықлары бойынша Қарақалпақстан Республикасы аймақлық ўәкили (Омбудсман), Қарақалпақстан Республикасы Жоқарғы Кеңесиниң депутаты З.Реймова колонияда жаза мүддетин өтеп атырған шахсларға жаратылған шараятлар менен танысып, олардың мүрәжатларын тыңлады. Мүрәжатлардың айырымлары нызам талаплары тийкарында тийисли тараў ўәкиллери менен бирге унамлы шешилетуғын болды.

Қарақалпақстан Республикасы Жоқарғы Кеңесиниң баспасөз хызмети