Халықты үй-жай менен тәмийинлеў мәселеси парламент ҳәм жәмийетшилик қадағалаўында

Ѳзбекстан Республиксы Олий Мажлиси Сенаты Кеңесиниң 2021-жыл 15-март күнги қарарына муўапық, үй-жай қурылысы ҳәм ипотека базарын раўажландырыўға байланыслы әҳмийетли ўазыйпалардың әмелге асырылыўы үстинен парламент ҳәм жәмийетшилик қадағалаўын орнатыў ҳәмде «Халықшыл» комиссиясы жумысын шѳлкемлестириў бойынша Шоманай районына бириктирилген Қарақалпақстан Республикасы Жоқарғы Кеңеси депутаты З.Реймова халық депутатлары районлық Кеңеси депутатлары менен ушырасты.

Ушырасыў даўамында «Халықшыл» комиссиясы режесиниң мазмун-мәниси ҳаққында түсиниклер берилип, комиссия жумысын жеделлестириў, белгиленген ўазыйпаларды сапалы ҳәм өз ўақтында әмелге асырыў, машқалаларды унамлы шешиў мәселелери додаланды.

Атап өтилгениндей, Өзбекстан Республикасы Президенти тәрепинен 2021-жыл 11-мартта “Базар принциплерине тийкарланған ипотека кредитлерин ажыратыў арқалы халықты турақ-жай менен тәмийинлеўге байланыслы қосымша илажлар ҳаққында”ғы Пәрманы қабыл етилип, онда ипотека кредитлери арқалы халықты үй-жай менен тәмийинлеў, үй-жай шараятларын жақсылаўға мүтәж шаңарақларды социаллық ҳәм материаллық жақтан қоллап-қуўатлаў бойынша бир қатар ўазыйпалар белгилеп берилди.

Пәрманға муўапық, социаллық бирге ислесиўди күшейтиў, компенсация, субсидиялар ҳәм мәмлекет тәрепинен усынылатуғын басқа жеңилликлерди әдиллик пенен бөлистириў ҳәмде олардан нәтийжели пайдаланыў мақсетинде аймақларда сенаторлар, депутатлар ҳәм жәмийетлик белсендилер қатнасыўында «Халықшыл» комиссиялары шөлкемлестирилди.

«Халықшыл» комиссиялар жергиликли ҳәкимликлер ҳәмде тийисли мәмлекетлик мәкемелердиң үй-жайлар қурыў ушын жер участкаларын ажыратыў, қурылыс жумысларын өз ўақтында ҳәм сапалы әмелге асырыў, субсидия төленетуғын пуқараларды таңлап алыў, үй-жай шараятларын жақсылаўға мүтәж болған пуқаралардың дизимин қәлиплестириў жумысы үстинен жәмийетшилик қадағалаўды орнатыў ҳәмде тараўда бюрократия ҳәм басқа ҳәкимшилик тосықлардың алдын алыўға қаратылған анық илажларды әмелге асырады.

Қарақалпақстан Республикасы Жоқарғы Кеңесиниң баспасөз хызмети