Социаллық шериклик бойынша жәмийетлик комиссиясының мәжилиси  өткерилди

14-апрель күни Қарақалпақстан Республикасы Жоқарғы Кеңеси жанындағы Социаллық шериклик бойынша жәмийетлик комиссиясының мәжилиси болып өтти.

Оған Өзбекстан Республикасы Олий Мажлиси Нызамшылық палатасының депутатлары, Олий Мажлис жанындағы Мǝмлекетлик емес коммерциялық емес шөлкемлери ҳǝм пуқаралық жǝмийетиниң басқа да институтларын қоллап-қуўатлаў Жǝмийетлик фонды ўәкиллери, Қарақалпақстан Республикасы Жоқарғы Кеңеси жанындағы Социаллық шериклик бойынша жәмийетлик комиссиясының ағзалары, Қарақалпақстан Республикасы Жоқарғы Кеңеси жанындағы мǝмлекетлик емес коммерциялық емес шөлкемлерди ҳǝм пуқаралық жǝмийетиниң басқа да институтларын қоллап-қуўатлаў жǝмийетлик фонды, мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтлары ҳəмде ғалаба хабар қураллары ўǝкиллери қатнасты.

Мәжилисти Қарақалпақстан Республикасы Жоқарғы Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитети баслығы, Социаллық шериклик бойынша жәмийетлик комиссиясының баслығы Д.Қурбаниязов ашты ҳәм алып барды.

Атап өтилгениндей, бүгинги күнде Ҳүрметли Президентимиздиң басшылығында елимизде әмелге асырылып атырған реформаларда белсене қатнасыўшы ҳәм бирге ислесиўши сыпатында мәмлекетлик емес коммерциялық емес шөлкемлердиң ролин және де арттырыў, олардың ҳуқықлары ҳәм нызамлы мәплерин қорғаўды беккемлеў, мәмлекет тәрепинен қоллап-қуўатлаў көлемин кеңейтиў ҳәмде оларға қолайлы шараятлар жаратыў бағдарында унамлы жумыслар әмелге асырылмақта.

Əсиресе, Өзбекстан Республикасы Президенти тәрепинен қабыл етилген “2021-2025-жылларда Пуқаралық жәмийетин раўажландырыў концепциясын тастыйықлаў ҳаққында”ғы Пәрманы пуқаралық жәмийетин раўажландырыўдың ҳуқықый тийкарларын, пуқаралық жәмийети институтларына көмек бериў ҳәмде оларды мәмлекет тәрепинен қоллап-қуўатлаў механизмин және де жетилистириўге, мәмлекетлик ҳәм жәмийетлик басқарыўда пуқаралық жәмийети институтларының актив қатнасыўы ушын зәрүр шараятларды жаратыўға, мәмлекетлик социаллық жойбарларды әмелге асырыўда пуқаралық жәмийети институтларының қатнасын және де кеңейтиўге тийкар жаратпақта.

Сондай-ақ, Ҳүрметли Президентимиз тəрепинен усы жылдың 3-март күни қабыл етилген “Мәмлекетлик емес коммерциялық емес шөлкемлерин мәмлекет тәрепинен қоллап-қуўатлаў, олардың жумысының еркинлигин, ҳуқықлары ҳәм нызамлы мәплериниң қорғалыўын тәмийинлеўге байланыслы қосымша илажлар ҳаққында”ғы Қарарында Қарақалпақстан Республикасы Жоқарғы Кеңеси жанындағы мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларын қоллап-қуўатлаў жәмийетлик фондының структурасы ҳәм олардың хызметкерлериниң мийнетине ҳақы төлеў разрядларын тастыйықлаў, 2021-жылы Қарақалпақстан Республикасы бюджетинен усы жәмийетлик фондты сақлаў қәрежетлерине ҳәмде олардың тийкарғы жумыс бағдарларын әмелге асырыў ушын 1,1 миллиард сўм қаржы ажыратыў ўазыйпалары белгилеп берилген.

Бул өз гезегинде жергиликли бюджеттен ажыратылған қаржылар есабынан мǝмлекетлик грант ҳәм социаллық буйыртпаларға қаржы ажыратыў имканиятын жаратып бермекте.

Өткен 2020-жылда Парламентлик комиссия тәрепинен жǝрияланған 5 таңлаўда аймағымыздағы мәмлекетлик емес коммерциялық емес шөлкемлери ҳәмде пуқаралық жәмийетиниң басқа да институларының 6 жойбары жеңимпаз деп табылып, олар ушын 233 млн. сўмлық қаржылар ажыратылды.

Мәжилис күн тәртибиндеги мәселелер, яғный Өзбекстан Республикасы Президентиниң 2021-жыл 3-марттағы “Мәмлекетлик емес коммерциялық емес шөлкемлерин мәмлекет тәрепинен қоллап-қуўатлаў, олардың жумысының еркинлигин, ҳуқықлары ҳәм нызамлы мәплериниң қорғалыўын тәмийинлеўге байланыслы қосымша илажлар ҳаққында”ғы Қарарының ҳәмде 2021-жыл 4-марттағы “2021-2025-жылларда Пуқаралық жәмийетин раўажландырыў концепциясын тастыйықлаў ҳаққында”ғы Пәрманының мазмуны ҳәм әҳмийети ҳаққында Өзбекстан Республикасы Олий Мажлиси Нызамшылық палатасының депутаты, Олий Мажлис жанындағы Парламентлик комиссияның баслығы А.Шадманов,  Өзбекстан Республикасы Олий Мажлиси Нызамшылық палатасының депутаты, Парламентлик комиссия ағзасы З.Ибрагимова кеңнен түсиник берди.

Өзбекстан Республикасы Олий Мажлиси жанындағы Мǝмлекетлик емес коммерциялық емес шөлкемлери ҳǝм пуқаралық жǝмийетиниң басқа да институтларын қоллап-қуўатлаў Жǝмийетлик фонды директоры О.Хусанов 2021-жылда мǝмлекетлик емес коммерциялық емес шөлкемлери ҳǝм пуқаралық жǝмийетиниң басқа да институтларының жойбар ҳәм бағдарламаларын мǝмлекетлик грантлар ҳәм мәмлекетлик социаллық буйыртпалар тийкарында қоллап-қуўатлаўдың бағдарлары ҳақкында, Қарақалпақстан Республикасы Әдиллик министри С.Мамбеткадыров Қарақалпақстан Республикасы Жоқарғы Кеңеси жанындағы мǝмлекетлик емес коммерциялық емес шөлкемлерди ҳǝм пуқаралық жǝмийетиниң басқа да институтларын қоллап-қуўатлаў жǝмийетлик фонды жумысының ҳуқықый тийкарлары ҳақкында, Финанс министриниң орынбасары Б.Пирниязов фондтың 2021-жылғы дәраматлар ҳәм қәрежетлер сметасы ҳаққында мағлыўмат берди.

Сондай-ақ, мәжилисте Қарақалпақстан Республикасы Жоқарғы Кеңеси жанындағы Социаллық шериклик бойынша жәмийетлик комиссияның ағзаларын исши топарларға бөлиў ҳаққында, соның менен бирге  мәмлекетлик гранттың биринши таңлаўының жөнелислерин ислеп шығыў туўралы мǝселелер қарап шығылды ҳәмде бул бойынша пикир ҳәм усыныслар тыңланып, тийисли ўазыйпалар белгилеп алынды.

Қарақалпақстан Республикасы Жоқарғы Кеңесиниң баспасөз хызмети