Нөкисте Омбудсман тәрепинен семинар шөлкемлестирилди

Нөкис қаласында Өзбекстан Республикасы Олий Мажлисиниң Инсан ҳуқықлары бойынша ўәкили (Омбудсман) тәрепинен «Судланғанлардың ҳәм қамақта сақланып атырған шахслардың ҳуқықлары ҳәм еркинликлерин қорғаў тараўында Өзбекстан Республикасы нызам ҳүжжетлери ҳәм халықаралық ҳуқықый нормалар» темасында семинар өткерилди.

Онда Өзбекстан Республикасы Олий Мажлисиниң Инсан ҳуқықлары бойынша Қарақалпақстан Республикасы аймақлық ўәкили (Омбудсман), Қарақалпақстан Республикасы Суды, прокуратурасы, Ишки ислер министрлиги, Әдиллик министрлиги ҳәм басқа-да тийисли шөлкемлердиң басшы ҳәм хызметкерлери қатнасты.

Семинарды Өзбекстан Республикасы Олий Мажлисиниң Инсан ҳуқықлары бойынша Қарақалпақстан Республикасы аймақлық ўәкили, Қарақалпақстан Республикасы Жоқарғы Кеңеси депутаты З.Реймова ашты ҳәм алып барды.

Атап өтилгениндей, тийкарғы Нызамымыз саналған елимиз Конституциясында инсан ҳуқықлары ҳәм еркинликлери мәмлекетлик сиясаттың баслы бағдары екени белгилеп қойылған. Әсиресе, ҳуқықый мәмлекет қурыў ҳәм демократиялық пукаралық жәмийетти қәлиплестириў мәселесине айрықша итибар қаратылып, бул бағдарда ҳуқықый тийкарлар ҳәр жыл сайын Нызам ҳәм басқада ҳуқықый ҳүжжетлер менен беккемленип бармақта.

Соны да атап өтиў керек, ҳуқықый демократиялық мәмлекет қурыўдың әҳмийетли шәртлеринен бири – бул инсан ҳуқықлары ҳәм еркинликлерин қорғаў болып табылады. Солай екен, халқымыз турмысы, еркинлиги, ар-намысы, қәдир-қымбаты ҳәм басқа да ажыралмас ҳуқықлар елимиздиң ең жоқары байлығы болып қала береди.

Семинарда Өзбекстан Республикасы Олий Мажлисиниң Инсан ҳуқықлары бойынша ўәкилиниң (Омбудсман) Секретарият баслығы С.Азимов,  Европа қәўипсизлик ҳәм бирге ислесиў шөлкеминиң (ОБСЕ) Өзбекистандағы жойбарлары Координаторының жойбарлар бойынша мәсләҳәтшиси И.Файзулин, Қазақстан Республикасында Инсан ҳуқықлары бойынша ўәкили жанындағы Миллий профилактика механизми Муўапықластырыўшы Кеңес ағзасы А.Ибраева судланғанлардың ҳәм қамақта сақланып атырған шахслардың ҳуқықлары ҳәм еркинликлерин қорғаў тараўында Өзбекстан Республикасы нызам ҳүжжетлери ҳәм халықаралық ҳуқықый нормалар ҳаққында түсиниклер берип, инсан ҳуқықлары ҳәм еркинликлери менен байланыслы мәселелерди үйрениў ҳәм олардың орынланыўын тәмийинлеў ўазыйпалары бойынша семинар қатнасыўшылары менен пикир алмасты.

Семинар соңыда қатнасыўшыларға сертификатлар тапсырылды.

Қарақалпақстан Республикасы Жоқарғы Кеңесиниң баспасөз хызмети