Депутат жәрдеминде пуқараның турақ жайы қайта қурып бериледи

Омбудсманның Қарақалпақстан Республикасы бойынша аймақлық ўәкили, Қарақалпақстан Республикасы Жоқарғы Кеңесиниң комитет баслығы, депутат З.Реймова аўыр турмыс шараятында жасап атырған пуқаралардың машқалаларын үйренип шықпақта.

Усы жылдың 16-апрель күни депутат З.Реймова «Шымбай шайхана» мәкан пуқаралар жыйынында пуқаралар менен ушырасыў өткерди. Ушырасыў даўамында «Шымбай шайхана» МПЖ баслығы Н.Қурбанов мәкан пуқаралар жыйыны аймағында жасаўшы пуқара, II топар майыбы П.Қущанов шаңарақ ағзалары менен авариялық жағдайдағы турақ жайда жасап киятырғанын ҳәм оның турақ жайын қайта қурып бериўде әмелий жәрдем сорап мүрәжат етти.

Омбудсманның Қарақалпақстан Республикасы бойынша аймақлық ўәкили, Жоқарғы Кеңес депутаты З.Реймова 2-сектор баслығы О.Худайбергенов пенен бииргеликте мүрәжатты үйренип шығыў мақсетинде пуқара П.Қущановтың жасаў шараяты менен танысты.

«Темир дәптер»де дизимде турған пуқара П.Қущановтын турақ жайы ҳақыйқатында да авариялық жағдайда болып, жасаў ушын қәўипли екени  анықланды. Сол жердиң өзинде депутат ҳәм прокурор жәрдеминде пуқараның турақ жайын қайта қурып бериў мәселеси унамлы шешим тапты. Ҳәзирги ўақытта қайта қурыў жумыслар баслап жиберилди.

Қарақалпақстан Республикасы Жоқарғы Кеңесиниң баспасөз хызмети