Нызам жойбарлары додаланды

Қарақалпақстан Республикасы Жоқарғы Кеңесинде Нызамлылық, суд-ҳуқық ҳәм коррупцияға қарсы гүресиў мәселелери комитетиниң гезекгети мәжилиси болып өтти.

Онда комитет ағзалары, Қарақалпақстан Республикасы Конституциялық бақлаў комитети,  Әдиллик министрлиги ўәкиллери менен бирге Өзбекстан Республикасы Олий Мажлиси Сенаты ағзалары, Нызамшылық палатасы депутатлары қатнасты.

Мәжилисти Қарақалпақстан Республикасы Жоқарғы Кеңесиниң Нызамлылық, суд-ҳуқық ҳәм коррупцияға қарсы гүресиў мәселелери комитети баслығы, депутат З.Реймова ашты ҳәм алып барды.

Атап өтилгениндей, елимизде ҳуқықый демократиялық жәмийет қурыў, пуқаралардың ҳуқық ҳәм еркинликлерин тәмийинлеў бағдарында әмелге асырылып атырған кең көлемли реформалар процесинде қабыл етилип атырған нызам ҳүжжетлериниң халықаралық ҳуқық нормаларына, заман талапларына сәйкес болыўын тәмийинлеў, оларға өзгерис ҳәм қосымшалар киргизиў аркалы жәнеде жетилистириў бүгинги күнниң әҳмийетли ўазыйпаларынан бири болып табылады.

Мәжилисте «Қарақалпақстан Республикасы Конституциялық бақлаў комитети ҳаққында»ғы (жаңа редакция) Қарақалпақстан Республикасы Нызамы жойбары, «Қарақалпақстан Республикасыныӊ «Сайлаў ҳаққында»ғы Нызамына өзгерислер ҳәм қосымшалар киргизиў ҳаққында»ғы Қарақалпақстан Республикасыныӊ Нызамы жойбары көрип шығылып, тийисли тараў қәнигелери менен биргеликте додаланды.

«Қарақалпақстан Республикасы Конституциялық бақлаў комитети ҳаққында»ғы (жаңа редакция) Қарақалпақстан Республикасы Нызамы жойбарының мақсети Қарақалпақстан Республикасы нызамларын, жоқары мәмлекетлик ҳәкимият ҳәм басқарыў уйымлары актлерин Қарақалпақстан Республикасы Конституциясына муўапықластырыў бойынша ҳуқықый қатнасықларды тәртипке салыўдағы нызамшылықты еле де жетилистириўге қаратылған.

Нызам жойбарында нәзерде тутылған тийкарғы өзгерислердиң бири бул Конституциялық бақлаўды әмелге асырыўдағы улыўма қағыйдаларға, комитет ағзаларының статусына, комитет ўәкилликлери ҳәм мәселелерди қарап шығыўының тийкарғы қағыйдаларына, комитет жумысын шөлкемлестириў ҳәм оның хызметине байланыслы басқа да мәселелерге еле де анықлық, өзгерис ҳәм қосымшалар киргизиўге қаратылған.

«Қарақалпақстан Республикасыныӊ «Сайлаў ҳаққында»ғы Нызамына өзгерислер ҳәм қосымшалар киргизиў ҳаққында»ғы Қарақалпақстан Республикасыныӊ Нызамы жойбары Өзбекстан Республикасыныӊ 2021-жыл 8-февраль күнги «Сайлаў Нызамшылығын жетилистириў мүнәсибети менен Өзбекстан Республикасыныӊ айырым нызам ҳүжжетлерине өзгерис ҳәм қосымшалар киргизиў ҳаққында»ғы 670-санлы Нызамыныӊ 4-статьясына муўапық ислеп шығылған.

Бул нызам жойбарының мақсети Қарақалпақстан Республикасы Жоқарғы Кеңеси депутатлары, халық депутатлары районлық ҳәм қалалық Кеңеслериниң депутатлары сайлаўларына таярлық көриў ҳәм оларды өткериўге байланыслы қатнасықларды тәртипке салыўдағы нызамшылықты еле де жетилистириўге қаратылған.

Мәжилисте нызамы жойбарларын қайта қарап шығыў ҳәм еледе жетилистириў бойынша пикир ҳәм усыныслар тыңланды.

Сондай-ақ, мәжилисте Өзбекстан Республикасы Олий Мажлис Сенаты ағзалары менен бирге Өзбекстан Республикасы Президентиниң 2020-жыл 11-ноябрьдеги “2020-2023-жылларда Қарақалпақстан Республикасын комплексли социаллык-экономикалык раўажландырыў илажлары ҳаққында”ғы қарарының орынланыўын тәмйинлеўде парламентлик ҳәм депутатлық қадағалаўды жәнеде күшейттириў бойынша пикир алмасылды.

Қарақалпақстан Республикасы Жоқарғы Кеңесиниң баспасөз хызмети