УРЫС ҚАТНАСЫЎШЫСЫНА САЎҒАЛАР ТАПСЫРЫЛДЫ

Еслеў ҳәм қәдирлеў күни алдынан

Қарақалпақстан Республикасы Жоқарғы Кеңесиниң Баслығы Мурат Камалов Еслеў ҳәм қәдирлеў күни алдынан Қараөзек районында жасаўшы, Екинши жер жүзилик урыс қатнасыўшысы Генжемурат ата Алланиязовтың шаңарағында болып, байрам саўғаларын тапсырды.

 

Жоқарғы Кеңес Баслығы ветеранды 9-май – Еслеў ҳәм қәдирлеў күни улыўмахалықлық байрамы, сондай-ақ, Екинши жер жүзилик урыста фашизм үстинен ерисилген жеңистиң 76 жыллығы менен қызғын қутлықлады ҳәм Өзбекстан Республикасы Президентиниң байрам қутлықлаўын оқып еситтирди.

 

Президентимиздиң усы жыл 20-апрельдеги «Екинши жер жүзилик урыс қатнасыўшыларын хошаметлеў ҳаққында»ғы пәрманы тийкарында Екинши жер жүзилик урыс қатнасыўшысы Генжемурат Алланиязовқа 12 миллион сум муғдарында бир мәртелик ақшалай сыйлық берилди. Сондай-ақ, урыс қатнасыўшысына мәмлекетимиз тәрепинен ажыратылған естелик саўғалары, Қарақалпақстан Республикасы Жоқарғы Кеңеси, Арқа-батыс әскерий округи, Қарақалпақстан Республикасы Қорғаныў ислери басқармасы, Қараөзек районы ҳәкимлиги ҳәм бир қатар шөлкемлер атынан баҳалы саўғалар тапсырылды. Генжемурат ата Президентимизге, елимиз басшыларына өз миннетдаршылығын билдирди.

Қарақалпақстан Республикасы Жоқарғы Кеңеси баспасөз хызмети