ЕСЛЕЎ БАР ЕКЕН МИЛЛЕТ ЖАСАЙДЫ

9-май – Еслеў ҳәм қәдирлеў күни ҳәмде Екинши жер жүзилик урыста ерисилген жеңистиң 76 жыллығы  белгиленди.

Пайтахтымызда байрам мүнәсибети менен өткерилген ушырасыў қатнасыўшылары онлайн видеобайланыс арқалы Ташкент қаласында шөлкемлестирилген Еслеў ҳәм қәдирлеў күни ҳәмде Екинши жер жүзилик урыста ерисилген жеңистиң 76 жыллығына бағышланған байрам илажында қатнасты.

Ҳүрметли Президентимиз уллы Жеңистиң 76 жыллығы ҳәмде еслеў ҳәм қәдирлеў күни мүнәсибети менен халқымызды қутлықлады.

Илажда Қарақалпақстан Республикасы Жоқарғы Кеңесиниң Баслығы М.Камалов Президентимиз ҳәм халқымызды байрам менен қутлықлады.  Елимизде урыс қатнасыўшылары ҳәм мийнет фронты ветеранларына ғамқорлық көрсетиў, оларды ҳәр тәреплеме қоллап-қуўатлаўға айрықша итибар қаратылып атырғанлығын атап өтти.

Президентимиздиң усы жыл 20-апрельдеги «Екинши жер жүзилик урыс қатнасыўшыларын хошаметлеў ҳаққында»ғы пәрманы тийкарында урыс қатнасыўшылары ҳәм фронт арты мийнет ветеранларын хошаметлеў мақсетинде республикамыздың барлық қала ҳәм районларында қатар илажлар әмелге асырылды. Урыс ветеранларының ҳалынан хабар алынып, оларға баҳалы саўғалар тапсырылды.

***

Байрам мүнәсибети менен пайтахтымыз Нөкис қаласындағы «Ҳәсиретли ана» естелиги майданына елимиз басшылары, мәмлекетлик ҳәм жәмийетлик уйымлар, сондай-ақ, кең жәмийетшилик ўәкиллери топланды.

Қарақалпақстан Республикасы Жоқарғы Кеңесиниң Баслығы М.Камалов байрам мүнәсибети менен «Ҳәсиретли ана» естелигине гүлшеңбер қойып, Екинши жер жүзилик урыста қурбан болғанлардың естелигине ҳүрмет көрсетти.

Сондай-ақ, Қураллы Күшлер системасына кириўши структуралар ўәкиллери де естеликке гүл қойды.

Илажда Ўатанымыз ҳәм тынышлығымыз қорғаўшыларының әскерий сап тартып жүриў салтанаты болып өтти.

Оннан соң байрам қатнасыўшылары “Ўатансүйиўшилер бағы”ның ашылыў мәресиминде қатнасты.

 

Қарақалпақстан Республикасы Жоқарғы Кеңеси Президиумының 2019-жыл декабрь айындағы қарары менен тастыйықланған жол картасы тийкарында қурылған бағ 9-май – Еслеў ҳәм қәдирлеў күни ҳәмде Екинши жер жүзилик урыста ерисилген жеңистиң 76 жыллығы байрамына өзгеше саўға болды.

Бул жерде Екинши жер жүзилик урыста жеңиске ерисиўде үлкен әҳмийетке ийе болған ҳәмде бүгинги күндеги заманагөй әскерий техникалардың көргизбеси шөлкемлестирилди. Соның менен бирге, урыста қаза тапқан мәрт Ўатан перзентлерине тийисли мағлыўматлар жәмленген «Еслеў үйи» де орын алған.

Қарақалпақстан Республикасы Жоқарғы Кеңесиниң баспасөз хызмети