“Жаңа Ɵзбекстанда еркин ҳәм абадан жасайық!” сүрени астында концерт бағдарламасы болып өтти

Нөкис қаласындағы Амфитеатрда “Жаңа Ɵзбекстанда еркин ҳәм абадан жасайық!” сүрени астында концерт бағдарламасы болып өтти.

Илажда Қарақалпақстан Республикасы Жоқарғы Кеңесиниң Баслығы М.Камалов,  сондай-ақ, Олий Мажлис Сенаты, ҳүкимет, министрлик ҳәм мәкемелер, кең жәмийетшилик ўәкиллери қатнасты.

Илажда Республика Руўхыйлық ҳәм ағартыўшылық орайының баслығы М.Ҳожиматов, Нөкис қаласы ҳәкими У.Панаев сөзге шығып, мәмлекетимизде Ҳүрметли Президентимиз тәрепинен әмелге асырылып атырған реформалар елимиздиң гүллеп-раўажланыўына, халқымыздың еркин ҳәм абадан турмысың тәмийинлеўге хызмет етип атырғанлығын атап өтти.

Өзбекстан Республикасы Президентиниң 2020-жыл 17-декабрь күнги «Өзбекстан Республикасы мәмлекетлик ғәрезсизлигиниң отыз жыллық байрамына таярлық көриў ҳәм оны жоқары дәрежеде өткериў ҳаққында»ғы қарарының орынланыўын тәмийинлеў, халқымыз неше жүз жыллық тарийхы даўамында арзыў еткен, елимиз турмысы ҳәм тәғдиринде түпкиликли бурылыс жасаған, ҳақыйқый мәнидеги уллы, даңқлы ўақыя – Өзбекстан Республикасы мәмлекетлик ғәрезсизлигиниң жәрияланғанының отыз жыллығын мүнәсип белгилеў мақсетинде республикамызда «Жаңа Өзбекстанда еркин ҳәм абадан жасайық!» идеясын өзинде жәмлеген шөлкемлестириўшилик-әмелий, руўхый-ағартыўшылық және үгит-нәсиятлаў илажлары өткерилмекте.

Республика Руўхыйлық ҳәм ағартыўшылық орайы басшылары, елимизге белгили әдебият, мәденият ҳәм көркем өнер ғайраткерлери республикамыздың қала ҳәм районларында “Жаңа Өзбекстан – Жаңа Ренессанс”, “Беккем шаңарақ – жәмийетимиздиң көрки”, «Ўатанымыздың раўажланыўына мениң үлесим», “Жаслар үшинши ренессанстың драйвери”, “Жаңа ояныў дәўири китапқумарлық ҳәм китапханалардан басланады”, “Жаңа Өзбекстан – жаңа шеклерге қарай” атамаларында мәдений-руўхый илажлар, дөретиўшилик ушырасыўларын өткерип, үгит-нәсият жумысларын алып бармақта.

“Жаңа Ɵзбекстанда еркин ҳәм абадан жасайық!” сүрени астында өткерилген концерт бағдарламасында Өзбекстан ҳәм Қарақалпақстан көркем өнер шеберлери ҳәмде жас талант ийелери тәрепинен өзбек ҳәм қарақалпақ халық қосықлары, миллий ҳәм жәҳән классикасынан үлгилер, Ўатан, ғәрезсизлик, тынышлық, абаданлық, жаслық ҳаққындағы қосық ҳәм намалар, аяқ ойынлары атқарылды.

Қарақалпақстан Республикасы Жоқарғы Кеңесиниң баспасөз хызмети