«Парламент ойынлары» спорт жарысларының аймақлық басқышы жуўмақланды

Нөкисте «Парламент ойынлары» спорт жарысларының аймақлық басқышы болып өтти.

Өзбекстан Республикасы Олий Мажлиси Сенаты Кеңесиниң 2020-жыл 30-декабрьдеги қарарына муўапық, сенаторлар ҳәм халық депутатлары жергиликли Кеңеслери депутатлары, Сенат жанындағы Жаслар парламенти ағзаларының денетәрбия ҳәм спорт пенен турақлы түрде шуғылланыўын тәмийинлеў,  халық арасында саламат турмыс тәризин үгит-нәсиятлаў мақсетинде өткерилип атырған «Парламент ойынлары» спорт жарысларының аймақлық басқышында Қарақалпақстан Республикасы ҳәм Хорезм ўәлаяты  қатнасыўшылары спорттың мини-футбол ҳәмде бадминтон түрлери бойынша беллести.

Жарыстың аймақлық басқышы жуўмақланып, оның жеңимпазлары менен сыйлы орын ийелеген қатнасыўшыларын сыйлықлаў мәресими болып өтти.

Сыйлықлаў мәресиминде Қарақалпақстан Республикасы Жоқарғы Кеңеси Баслығының орынбасары А.Давлетов  «Парламент ойынлары» спорт жарысларының аймақлық басқышы жеңимпазларын қутлықлады.

«Парламент ойынлары» спорт жарысларының аймақлық басқышында мини-футбол бойынша өткерилген беллесиўлерде Қарақалпақстан Республикасы Жоқарғы Кеңеси командасы, бадминтон бойынша ҳаял-қызлар арасында Жоқарғы Кеңес комитет баслығы, депутат З.Реймова биринши орынды ийелеп, республика басқышына жоллама алды.

«Парламент ойынлары» спорт жарысларының аймақлық басқышы жеңимпазлары менен сыйлы орын ийелеген қатнасыўшылары шөлкемлестириўшилер тәрепинен қымбат баҳалы саўғалар менен сыйлықланды.

 

Илажда көркем өнер шеберлери қатнасыўында концерт бағдарламасы қойып берилди.

Қарақалпақстан Республикасы Жоқарғы Кеңесиниң баспасөз хызмети