ЖОҚАРҒЫ КЕҢЕС БАСЛЫҒЫ БАЛАЛАРДЫ БАЙРАМ МЕНЕН ҚУТЛЫҚЛАДЫ

Балалар – өмиримиздиң қуўанышы, келешегимиз ийелери. Оларға меҳир ҳәм ғамқорлық көрсетиў, тәрбия бериў бәршемиздиң инсаныйлық миннетимиз.

1-июнь – Халықаралық балаларды қорғаў күни мүнәсибети менен пайтахтымыздағы реабилитация орайына ийе болған «Имкан» мәмлекетлик көп тармақлы қәнигелестирилген мектепке шекемги билимлендириў мәкемесинде байрам илажы болып өтти.

Илажда Қарақалпақстан Республикасы Жоқарғы Кеңесиниң Баслығы М.Камалов, Қарақалпақстан Республикасы Прокуроры Ф.Алламбергенов, Мектепке шекемги билимлендириў министри Ж.Уснатдинова, Нөкис қаласы ҳǝкими У.Панаев балаларды байрам менен қутлықлап, саўғалар тапсырды.

Ҳүрметли Президентимиз тәрепинен елимизде балалардың ҳуқықлары менен еркинликлерин қорғаў, олардың қәбилетлерин жүзеге шығарыўға айрықша итибар қаратылмақта.

Өзбекстан Республикасы Президентиниң 2018-жыл 16-августтағы «Аралбойы регионы балалары ушын реабилитация орайына ийе болған мәмлекетлик қәнигелестирилген көп тармақлы мектепке шекемги билимлендириў мәкемесин шөлкемлестириў илажлары ҳаққында»ғы Қарары тийкарында қурылып, 2019-жыл пайлаланыўға тапсырылған Реабилитация орайына ийе болған «Имкан» мәмлекетлик көп тармақлы қәнигелестирилген мектепке шекемги билимлендириў мәкемеси 120 орынға мөлшерленген болып, бүгинги күнде 118 бала тәрбияланбақта. Орайға еситиўинде, психологиялық раўажланыўында ҳәм ҳәрекет системасында нуқсаны болған 2 жастан 7 жас аралығындағы балалар қабылланады. Соның менен бирге, 2 жастан 16 жас аралығындағы балалар ҳәм жас өспиримлер де реабилитация орайына қатнаўына болады.

Мәкемеде Россия Федерациясының Москва қаласындағы «Балалық» реаблитация орайында, Санкт-Петербург қаласындағы А.И.Герцен атындағы Россия мәмлекетлик педагогикалық университетинде, Корея Республикасында тәжирийбе арттырып келген педагоглар, медицина хызметкерлери ҳәм дефектологлар  жумыс алып барады.

Ҳәзирги ўақытта бул балалар бақшасында 137 жоқары қәнигеликтеги медицина хызметкерлери ҳәм тәжирийбели педагог кадрлар коррекциялық педагогика жумысларын алып бармақта. Бул жерде балалардың денсаўлығын тиклеў, оларға билим ҳәм тәрбия бериў ушын барлық қолайлықлар жаратылған.

Илажда бақша тәрбияланыўшылары атқарыўындағы концерт бағдарламасы бәршеге байрам кейпиятын бағышлады.

Қарақалпақстан Республикасы Жоқарғы Кеңесиниң баспасөз хызмети