“МОЙНАҚҚА ЖӘРДЕМ” ЭКОЛОГИЯЛЫҚ ҚАЙЫРҚОМЛЫҚ ВЕЛОМАРАФОНЫ ҚАТНАСЫЎШЫЛАРЫ МОЙНАҚҚА ЖОЛ АЛДЫ

Пайтахтымызда Өзбекстан Республикасы Мәмлекетлик ғәрезсизлигиниң 30 жыллығына бағышлап өткерилип атырған “Мойнаққа жәрдем” экологиялық қайырқомлық веломарафонының жуўмақлаўшы басқышына старт берилди.

Усы мүнәсибет пенен болып өткен илажда Қарақалпақстан Республикасы Жоқарғы Кеңесиниң Баслығы Мурат Камалов, Өзбекстан Экологиялық партиясы Орайлық Кеңеси атқарыў комитети баслығы Нарзулло Обломуродов Ҳүрметли Президентимиз тәрепинен Аралбойы аймағының экологиялық, экономикалық ҳәм социаллық жағдайын жақсылаў, бул процеске халықаралық жәмийетшиликтиң итибарын қаратыў, теңиздиң қурыған ултанында жасыл тоғайлықлар жаратыў, Қарақалпақстанның барлық қала ҳәм районлары, әсиресе, Мойнақтың инфраструктурасын беккемлеў, халықтың абаданлығын тәмийинлеў бойынша әмелге асырылып атырған кең көлемли жумыслар өзиниң нәтийжелерин берип атырғанлығын, жақында Бирлескен Миллетлер Шөлкеминиң Бас Ассамблеясы 75-сессиясының гезектеги жалпы мәжилисинде Өзбекстан тәрепинен усынылған Аралбойы регионын экологиялық инновациялар ҳәм технологиялар аймағына айландырыў ҳаққындағы резолюцияның қабыл етилгени бул бағдардағы реформаларды жәнеде жоқары басқышқа көтеретуғынын атап өтти.

Өзбекстан ҳәм Қарақалпақстан Республикаларының мәмлекетлик гимни атқарылды.

Илажда көркем өнер шеберлери тәрепинен концерт бағдарламасы қойып берилди.

“Мойнаққа жәрдем” экологиялық қайырқомлық веломарафоны 21-май күни Әндижан ўәлаятының Хонобод районынан 13 велспортшы менен басланып, республикамыздың барлық ўәлаятларынан өтип, ҳәр бир аймақта спортшы ҳәм ҳәўескерлер қосылып, Қарақалпақстан Республикасына 50 ден артық велоспортшы менен жетип келди. Республикамыздан және 10 велоспортшы ҳәм 50 ге жақын ҳәўескер ҳәм кеўилли жаслар қосылды.

Нөкис қаласынан  жәми 100 ден аслам қатнасыўшылар Мойнаққа жол алды.

Қарақалпақстан Республикасы Жоқарғы Кеңесиниң баспасөз хызмети