БОЗАТАЎДА РЕСПУБЛИКА ЖАСЛАР ФЕСТИВАЛЫ БАСЛАНДЫ

7-июнь күни Бозатаў районындағы Амфитеатрда «Жаслар ҳаўазы» Республика жаслар фестивалының салтанатлы ашылыў мәресими болды.

Өзбекстан Республикасы Президенти 2020-жыл 2-октябрьде Қарақалпақстан Республикасы Жоқарғы Кеңесиниң гезексиз сессиясында елимиздиң қыз-жигитлерин Қарақалпақстанның турмысы менен таныстырыў мақсетинде жаслар фестивалын шөлкемлестириў усынысын билдирген еди.

“Жаслар ҳаўазы” Республика жаслар фестивалында елимиздиң барлық аймағынан қатнасыўшылар – өз аймақларында теңсиз деп табылған жас талант ийелери ҳәм мийманлар қатнаспақта.

Мәресимде Қарақалпақстан Республикасы Жоқарғы Кеңесиниң Баслығы Мурат Камалов сөзге шығып, елимиз жасларын фестивальдың ашылыўы менен шын кеўилден қутлықлады ҳәм оларға тасқын табыслар тиледи.

«Жаслар ҳаўазы» Республика жаслар фестивалы шеңберинде илим-пән, әдебият, мәденият, көркем өнер, спорт, китапқумарлық, информациялық технологиялар, өнерментшилик, миллий тағамлар сыяқлы бир қатар бағдарлар бойынша жаслар арасында көрик-таңлаў, жарыс, конференция, ушырасыў ҳәм фестиваллар өткерилмекте.

«Жаслар ҳаўазы» Республика жаслар фестивалының салтанатлы ашылыў мәресиминде Өзбекстан ҳәм Қарақалпақстан көркем өнер шеберлери, эстрада қосықшылары ҳәм жас талант ийелери қатнасыўындағы гала-концерт бағдарламасы қойып берилди.

Қарақалпақстан Республикасы Жоқарғы Кеңесиниң баспасөз хызмети