Пуқараның турақ жайы қайта қурып берилди

Қарақалпақстан Республикасы Жоқарғы Кеңесиниң комитет баслығы, Омбудсманның Қарақалпақстан Республикасы бойынша аймақлық ўәкили З.Реймова усы жылдың апрель айында Нөкис қаласында аўыр турмыс шараятында жасап атырған пуқаралардың машқалаларын үйренип шыққан еди.

Үйрениўлер даўамында «Шымбай шайхана» мәкан пуқаралар жыйыны баслығы Н.Қурбанов мәкан пуқаралар жыйыны аймағында жасаўшы пуқара, II топар майыбы П.Қущановтың шаңарақ ағзалары менен авариялық жағдайдағы турақ жайда жасап киятырғанын айтып, оның турақ жайын қайта қурып бериўде әмелий жәрдем сорап мүрәжат еткен еди.

Бул мүрәжат бойынша Жоқарғы Кеңес депутаты, Омбудсманның Қарақалпақстан Республикасы бойынша аймақлық ўәкили З.Реймова 2-сектор баслығы О.Худайбергенов пенен бииргеликте мүрәжатты үйренип шығыў мақсетинде пуқара П.Қущановтың жасаў шараяты менен танысты, оның турақ жайы ҳақыйқатында да авариялық жағдайда болып, жасаў ушын қәўипли екени  анықланды.

Көп узамай мүрәжат унамлы шешилип, пуқара П.Қущановтың ески үйи орнында жаңа үш ханалы турақ жай қурып берилди.

Қарақалпақстан Республикасы Жоқарғы Кеңесиниң баспасөз хызмети