ҚАРАҚАЛПАҚСТАН РЕСПУБЛИКАСЫ ЖОҚАРҒЫ КЕҢЕСИНИҢ ОН ТОҒЫЗЫНШЫ СЕССИЯСЫ ҲАҚҚЫНДА МӘЛИМЛЕМЕ

19-июнь күни Қарақалпақстан Республикасы Жоқарғы Кеңесиниң он тоғызыншы сессиясы болып өтти.

Видеоконференцбайланыс тәризинде өткен сессияға Өзбекстан Республикасы Олий Мажлиси Сенаты, Қарақалпақстан Республикасы ҳүкимети ағзалары, секторлардың ҳәм тараўлардың басшылары, ғалаба хабар қуралларының ўәкиллери, сондай-ақ, Жоқарғы Кеңестиң депутатлары қала ҳәм район студияларында қатнасты.

Сессияны Қарақалпақстан Республикасы Жоқарғы Кеңеси Баслығының орынбасары  А.Давлетов кирис сөз бенен ашты ҳәм басқарып барды.

Депутатлар сессияның Секретариатын сайлады ҳәм күн тәртибин тастыйықлады.

Атап өтилгениндей, бүгинги күнде Президентимиз басламасы менен мәмлекетимизде нызам үстемлигин ҳәм пуқаралардың конституциялық ҳуқықларын, жәмийетте әдилликти тәмийинлеў бойынша кең көлемли илажлар әмелге асырылмақта.

Усы жылдың 12-июнь күни өткерилген Жоқарғы Кеңестиң 18-сессиясында «Қарақалпақстан Республикасы Конституциялық бақлаў комитети ҳаққында»ғы Қарақалпақстан Республикасы Нызамының (жаңа редакцияда) жойбары көрип шығылып, депутатлар тәрепинен мақулланған еди.

Бүгинги сессия күн тәртибинде «Қарақалпақстан Республикасы Конституциялық бақлаў комитетиниң ағзаларын сайлаў ҳаққында»ғы мәселе көрип шығылды.

Конституциялық бақлаў комитетиниң ағзалығына Жоқарғы Кеңес Баслығы тәрепинен Султамурат Кутлумуратов, Марияш Турымбетова ҳәм Елизавета Кутыбаеваның кандидатурасы усынылды.

 

Депутатлар бул мәселе бойынша тийисли қарар қабыл етти.

Усының менен Қарақалпақстан Республикасы Жоқарғы Кеңесиниң он тоғызыншы сессиясы өз жумысын жуўмақлады.

Қарақалпақстан Республикасы Жоқарғы Кеңесиниң баспасөз хызмети

М.Ҳабибуллаев түсирген сүўретлер