Баспасөз ҳәм ғалаба хабар қураллары хызметкерлери күни белгиленди

Қарақалпақ мәмлекетлик жас тамашагөйлер театрында 27-июнь – Баспасөз ҳәм ғалаба хабар қураллары хызметкерлери күни мүнәсибети менен байрам илажы өткерилди.

Салтанатлы илажда баспасөз ҳәм ғалаба хабар қураллары хызметкерлери, тараў ветеранлары қатнасты.

Қарақалпақстан Республикасы Жоқарғы Кеңесиниң комитет баслығы Д.Қурбаниязов Баспасөз ҳәм ғалаба хабар қураллары хызметкерлерине Қарақалпақстан Республикасы Жоқарғы Кеңеси менен Министрлер Кеңесиниң байрам қутлықлаўын оқып еситтирди.

Қарақалпақстан Республикасы Жоқарғы Кеңеси Баслығының орынбасары А.Давлетов баспасөз ҳәм ғалаба хабар қураллары хызметкерлерин қутлықлап, соңғы жылларда елимизде Ҳүрметли Президентимиз басшылығында мәлимлеме ҳәм сөз еркинлигин тәмийинлеў, ғалаба хабар қуралларын ҳәр тәреплеме қоллап-қуўатлаў, тараў пидайыларын мүнәсип хошаметлеўге айрықша итибар қаратылып атырғанлығын атап өтти.

Қарақалпақстан Республикасы Жоқарғы Кеңеси Президиумының қарары менен елимиздиң социаллық-экономикалық, жәмийетлик-сиясий ҳәм мәдений турмысында жүз берип атырған өзгерислер менен жаңаланыўларды кең жәмийетшиликке жеткериўдеги белсендилиги, халықтың руўхый дүньясын байытыўдағы пидайылығы, өз кәсибине болған садықлығы ушын бир топар баспасөз ҳәм ғалаба хабар қураллары хызметкерлери ҳүрметли атақ ҳәм көкирек белгилери менен сыйлықланды.

Сондай-ақ, илажда Қарақалпақстан Республикасы Мәлимлеме ҳәм ғалаба коммуникациялар басқармасы   дүзилгенине 90 жыл, «Қарақалпақстан жаслары» газетасы   шығып баслағынына 90 жыл, «Халқ минбари» газетасы ҳәм «Мийнет байрағы» газетасына 75 жыл, «Қанлыкөл хабарлары» газетасы жарық көргенине 50 жыл, «Қарақалпақ әдебияты» газетасы шығып баслағынына 10 жыл толыўы мүнәсибети менен усы газеталар редакцияларына, соның менен бирге, бир қатар баспасөз, телевидение ҳәм радио, интернет журналистикасы, мәлимлеме хызмети, баспахана хызметкерлерине Қарақалпақстан Республикасы Жоқарғы Кеңеси менен Министрлер Кеңеси атынан баҳалы саўғалар тапсырылды.

 

 

Илажда көркем өнер шеберлери ҳәм жас талант ийелериниң атрқарыўында концерт бағдарламасы қойып берилди.

Бундай илажлар республикамыз қала ҳәм районларында да шөлкемлестириўшилик пенен өткерилмекте.

Қарақалпақстан Республикасы Жоқарғы Кеңесиниң баспасөз хызмети