Қол урысы бойынша халықаралық турнир болып өтти

2-июнь күни Нөкис қаласындағы Амфитеатрда қол урысы бойынша профессионал спортшылар арасында халықаралық турнир болып өтти.

Турнирде елимиз спортшылары менен бирге Россия, Беларусь, Украина, Әзербайжан ҳәмде Камеруннан келген қол урысы шеберлери беллести.

Дәслеп турнирдиң салтанатлы ашылыў мәресими шөлкемлестирилди. Онда Қарақалпақстан Республикасы Жоқарғы Кеңесиниң Баслығы М.Камалов, ҳүкимет ағзалары, турнирди шөлкемлестирген министрлик ҳәм мәкемелер ўәкиллери қатнасты.

Өзбекстан ҳәм Қарақалпақстан Республикасы мәмлекетлик гимнлери атқарылды.

Мәресимде сөзге шыққанлар елимизде Президентимиз тәрепинен спортты раўажландырыў, өсип киятырған жас әўладты ҳәр тәреплеме саламат инсанлар болып ер жетиўин тәмийинлеў, жас спортшыларды қоллап-қуўатлаўға айрықша итибар қаратылып атырғанлығын атап өтти ҳәм спортшыларға әўмет тиледи.

Турнирдиң дәслепки беллесиўи 65 килограмм салмақтағы спортшылар арасында болды. Онда жерлесимиз, қол урысы бойынша еки мәрте Өзбекстан чемпионы, халықаралық турнирлердиң сыйлы орын ийеси Нурпейс Қарлыбаев әзербайжанлы спортшы, халықаралық турнирлер ҳәм жәҳән чемпионаты сыйлы орын ийеси Руслан Маммадовты жеңди.

Турнирдиң 75 килограмм салмақтағы спортшылар арасындағы беллесиўде жерлесимиз, қол урысы бойынша еки мәрте Өзбекстан чемпионы, халықаралық турнирлердиң сыйлы орын ийеси Шерзад Жуманазаров камерунлы спортшы Рушие Шанелди мүддетинен алдын жеңген болса, усы салмақ категориясындағы титуллық беллесиўде  қол урысы бойынша Азия ҳәм жәҳән чемпионы Жаҳонгир Жумаев беларуслы Артём Булоичукти нокаутқа ушыратты.

Спортшыларымызды  Қарақалпақстан Республикасы Жоқарғы Кеңесиниң Баслығы М.Камалов қутлықлап, оларға пул сыйлықлары менен естелик саўғаларын тапсырды.

Сондай-ақ, турнирде Мафтуна Қувондиқова россиялы Диана Саадуллаеваның, Шахбоз Турсунов россиялы Арсен Мутачевтиң, Олим Нормуродов украиналы Анатолий Журакиевскийдиң үстинен жеңиске еристи.

Қарақалпақстан Республикасы Жоқарғы Кеңесиниң баспасөз хызмети