Жоқарғы Кеңес хызметкерлери коронавирус инфекциясына қарсы вакцина алды

Пүткил дүньяда коронавирус пенен кеселленгенлер саны күн сайын, саат сайын артып баратырғаны ҳеш кимге сыр емес.

Жонс Хопкинс университетиниң бүгинги сәне менен берген мағлыўматында кеселликти 186 миллион 800 мыңнан артық адам жуқтырғаны, олардан 4 миллион 031 мыңнан артығы қайтыс болғаны айтылмақта. (https://www.uza.uz/uz/posts/dunyoda-koronavirus-bilan-kasallanganlar-soni-186-million-nafardan-oshdi_283903)

Дүньяда ҳүким сүрип атырған бундай кескин жағдайға қарсы гүресиў ушын елимизде тийисли илажлар әмелге асрыылмақта. Халықты басқышпа-басқыш коронавирусқа қарсы ғалаба түрде шаншыў әне сондай илажлардан бири болып есапланады.

12-июль күни Қарақалпақстан Республикасы Жоқарғы Кеңеси Аппараты ҳәм техник хызметкерлери коронавирусқа қарсы вакцина менен 1-басқышта шаншылды.

Вакцина адам организминде антиденешелерди пайда етип, вирусқа қарсы иммунитеттиң гүресиўшеңлигин арттырады. Буның нәтийжесинде коронавирус кеселлигин жуқтырып алыў итималы пәсейеди.

Қарақалпақстан Республикасы Жоқарғы Кеңесиниң баспасөз хызмети