Таңлаў жеңимпазына сертификат тапсырылды

18-август күни Қарақалпақстан Республикасы Жоқарғы Кеңесинде Жоқарғы Кеңес жанындағы мәмлекетлик емес коммерциялық емес шөлкемлерди ҳәм пуқаралық жәмийетиниң басқа да институтларын қоллап-қуўатлаў Жәмийетлик фонды тәрепинен мәмлекетлик социаллық буйырпа бойынша жәрияланған 4-таңлаўдың жеңимпазы на сертификат тапсырылды.

Усы жыл 27-июль күни  өткерилген Қарақалпақстан Республикасы Жоқарғы Кеңеси жанындағы Социаллық шериклик бойынша жәмийетлик комиссияның мәжилисинде таңлаўға келип түскен жойбарлардың мазмуны, тийкарғы мақсетлери, әмелге асырыў механизмлери ҳәм күтилип атырған нәтийжелери комиссия ағзалары тәрепинен кеңнен додаланып, “Арал алтын мийрасы” жәмийетлик бирлеспесиниӊ “Қарақалпақстан Республикасыныӊ аўыллық аймақларында социаллық машқалаларды шешиў ҳәмде кем тәмийинленген халық, әсиресе жаслар ҳәм ҳаял-қызларда исбилерменлик көнликпелерин қәлиплестириў  ҳәм олардыӊ бәнтлигин тәмийинлеўдеги социллық бирге ислесиўдиӊ инновациялық механизмлери” атамасындағы жойбары комиссия ағзалары тәрепинен берилген даўыслар тийкарында жеӊимпаз деп табылған еди.

Қарақалпақстан Республикасы Жоқарғы Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитетиниӊ баслығы, Жоқарғы Кеңес жанындағы Социаллық шериклик бойынша жәмийетлик комиссияның баслығы Д.Қурбаниязов таңлаў жеңимпазын қутлықлап, бул жойбар келешекте елимиздиң раўажланыўына, халық ийгилигине хызмет ететуғынлығына исеним билдирди.

Қарақалпақстан Республикасы Жоқарғы Кеңесиниң баспасөз хызмети