ТАҢЛАЎЛАРДЫҢ ЖЕҢИМПАЗЛАРЫ МҮНӘСИП СЫЙЛЫҚЛАНДЫ

Қарақалпақстан Республикасы Министрлер Кеңесинде Ҳаял-қызлар машқалаларын системалы түрде шешиў, оларды социаллық жақтан қоллап-қуўатлаў бойынша Республика комиссиясы тәрепинен өткерилип атырған “Кәсиплик аўқамлары лауреаты”, “Ең үлгили ҳаял жумыс бериўши”, “Ең жақсы мәҳәлле баслығы” ҳәмде “Ең жақсы сектор баслығы” таңлаўларының Қарақалпақстан Республикасы басқышы жеңимпазларын сыйлықлаўға бағышланған илаж болып өтти.

Онда Қарақалпақстан Республикасы Жоқарғы Кеңесиниң Баслығы М.Камалов, Өзбекстан кәсиплик аўқамлары Федерациясының Қарақалпақстан Кеңеси баслығы У.Жалменов сөзге шығып, Ҳүрметли Президентимиз тәрепинен халықтың социаллық қорғаўға мүтәж қатламын, әсиресе, ҳаял-қызларды ҳәр тәреплеме қоллап-қуўатлаўға айырқша итибар қаратылып атырғанлығын атап өтти.

Өзбекстан кәсиплик аўқамлары Федерациясы басшылығындағы Республика комиссиясы ҳәм оның қурамындағы Жумысшы топарлар мәмлекетимиз аймақларында «Ҳаяллар дәптери»не киргизилген ҳаял-қызлар машқалаларын системалы шешиў ҳәм оларға әмелий жәрдем көрсетиў барысында кең көлемли жумысларды әмелге асырмақта. Сондай-ақ, бул ийгиликли ислерди әмелге асырыўда үлгили ҳәм системалы жумыс алып барған жуўаплы хызметкерлерди хошаметлеў әмелияты жолға қойылды.

Бунда  “Кәсиплик аўқамлары лауреаты”, “Ең үлгили ҳаял жумыс бериўши”, “Ең жақсы мәҳәлле баслығы” ҳәмде  “Ең жақсы сектор баслығы” таңлаўларының өткерилиўи үлкен әҳмийетке ийе болмақта. Таңлаўлардың қала ҳәм район басқышлары усы жылдың июнь айында, Қарақалпақстан Республикасы басқышы июль айында өткерилди.

“Кәсиплик аўқамлары лауреаты” таңлаўында Кегейли районы “Рус-Ислам-Султан” шаңарақлық кәрханасы баслығы Айжамал Раметова биринши, Беруний районынан жеке тәртиптеги исбилермен Роза Джуманазарова екинши, Қараөзек районынан жеке тәртиптеги исбилермен Замира Утепбергенова үшинши орынды ийеледи.

“Ең жақсы мәҳәлле баслығы” таңлаўында Нөкис қаласы “Сарбиназ” МПЖ баслығы Мадияр Аминов биринши, Шымбай районы “Пашент таў” АПЖ баслығы Азизбек Айтымбетов екинши, Қоңырат районы “Қоңырат” МПЖ баслығы Марияш Уразалиева үшинши болды.

“Ең үлгили ҳаял жумыс бериўши” таңлаўында Әмударья районы “Тамара текстиль” ЖШЖ баслығы Тамара Юсупова биринши, Қоңырат районы “Устюрт гилемлери” ислеп шығарыў кәрханасы баслығы Гулжайсан Сағынбаева екинши, Шоманай районы “SHOMANAY SHAMENAY” ЖШЖ баслығы Шахрибану Юсупбаева үшинши орынды ийеледи.

“Ең жақсы сектор баслығы” таңлаўында Қараөзек районы 1-сектор баслығы, район ҳәкими Узақберген Утамбетов биринши, Шоманай районы 3-сектор баслығы Полат Искендеров екинши, Бозатаў районы 4-сектор баслығы Жанибек Казбеков үшинши орынды ийеледи.

 

Таңлаўлардың жеңимпазлары ҳәм сыйлы орын ийелери шөлкемлестириўшилер тәрепинен сыйлықланды. Таңлаўлардың Қарақалпақстан Республикасы басқышында биринши орынларды ийелеген жеңимпазлар Республика басқышында қатнасыў ушын жоллама алды.

Өзбекстан кәсиплик аўқамлары Федерациясының
 Қарақалпақстан Кеңеси мағлыўматлары тийкарында таярланды

 Қарақалпақстан Республикасы Жоқарғы Кеңесиниң баспасөз хызмети