ЎАТАНЫМЫЗДЫҢ ЖОҚАРЫ СЫЙЛЫҚЛАРЫ ТАПСЫРЫЛДЫ

Елимиз ғәрезсизлигин беккемлеў, халқымыздың мәнаўиятын  раўажландырыў, экономикалық қүдиретин беккемлеў, тынышлығын сақлаў, халқымыздың абадан турмысын тәмийинлеўдеги айрықша хызметлери, жәмийетлик жумысларда белсене қатнасқаны ушын бир топар жерлеслеримиз Өзбекстан Республикасы мәмлекетлик ғәрезсизлигиниң 30 жыллық байрамы қарсаңында Президентимиздиң пәрманлары менен ҳүрметли атақлар, орден ҳәм медальлар, сондай-ақ. “Өзбекстан Республикасы ғәрезсизлигиниң 30 жыллығы” естелик белгилери менен сыйлықланды.

Қарақалпақстан Республикасы Жоқарғы Кеңесинде усы сыйлықларды тапсырыў мәресими болды.

Илажда Қарақалпақстан Республикасы Жоқарғы Кеңесиниң Баслығы М.Камалов жыйналғанларды ең уллы, ең әзиз байрамымыз, елимиз ғәрезсизлигиниң 30 жыллық байрамы менен қызғын қутлықлады.

Атап өтилгениндей, соңғы жыллары Президентимиз тәрепинен  турмысымыздың барлық тараўларында кең көлемли реформалар, дөретиўшилик жумыслары әмелге асырылмақта. Жаңа Өзбекстанды қурыў, елимиздиң социаллық-экономикалық турмысында үлкен өзгерислерди әмелге асырыў, халқымыздың абадан турмысын тәмийинлеўге айрықша итибар қаратылмақта.

Әне сондай ийгиликли мақсетлерди әмелге асырыўда пидайылық көрсеткен, елимиз ғәрезсизлигиниң жәнеде беккемлениўине үлкен үлесин қосып киятырған ўатанласларымыздың мийнети жоқары баҳаланбақта.

Илажда мәмлекетлик сыйлықлар – ҳүрметли атақлар, орден ҳәм медальлар, естелик белгилери өз ийелерине салтанатлы жағдайда тапсырылды.

Сыйлықланғанлар атынан сөзге шыққанлар мийнетлерин жоқары баҳалағаны ушын Президентимизге шексиз миннетдаршылық билдирди.

Илажда Қарақалпақстан Республикасы Жоқарғы Кеңеси Баслығының орынбасары А.Давлетов қатнасты.

* * *

30-август күни бир топар мийнет ветеранлары, социаллық-экономикалық тараўлардың басшы ҳәм хызметкерлерине де “Өзбекстан Республикасы ғәрезсизлигиниң 30 жыллығы” естелик белгилери салтанатлы түрде тапсырылды.

Қарақалпақстан Республикасы Жоқарғы Кеңесиниң баспасөз хызмети