ЖОҚАРҒЫ КЕҢЕС БАСЛЫҒЫ МЕКТЕП ОҚЫЎШЫЛАРЫНА «ҒӘРЕЗСИЗЛИК САБАҒЫ»Н ӨТТИ

Республикамыздағы улыўма орта билим бериў мектеплеринде 2021/2022-оқыў жылының басланыўы мүнәсибети менен биринши қоңыраў ҳәм «Ғәрезсизлик сабағы» илажлары өткерилди.

Пайтахтымыздағы 37-улыўма орта билим бериў мектебинде өткерилген салтанатлы илажда Қарақалпақстан Республикасы Жоқарғы Кеңесиниң Баслығы М.Камалов қатнасты.

Өзбекстан ҳәм Қарақалпақстан Республикалары мәмлекетлик гимни атқарылды.

Илажда Жоқарғы Кеңес Баслығы мектеп оқыўшыларын жаңа оқыў жылының басланыўы менен шын кеўилден қутлықлады, Ҳүрметли Президентимиз тәрепинен илгери сүрилген “Жаңа Өзбекстан мектеп босағасынан басланады” деген идея тийкарында тәлим ҳәм тәрбия системасында түпкиликли реформалар әмелге асырылып атырғанлығын айрықша атап өтти, оқыўшылардың келешекте Ўатанымыздың раўажланыўына үлкен үлес қосатуғынына беккем исеним билдирип, оларға бул жолда тасқын табыслар тиледи.

Илажда биринши қоңыраў қағылды.

 

 

Буннан соң Жоқарғы Кеңес Баслығы 1-класс оқыўшыларына «Ғәрезсизлик сабағы»н өтип, ғәрезсилик, тынышлық, абаданлық сыяқлы түсиниклердиң мазмун-мәнисин ҳәм әҳмийетин, бүгин елимизде әмелге асырылып атырған реформалар ҳәм өзгерислердеги, ерисилип атырған жетискенликлердеги ролин турмыслық мысаллар менен айтып берди ҳәм оқыўшыларға Президент саўғаларын тапсырды.

Қарақалпақстан Республикасы Жоқарғы Кеңесиниң баспасөз хызмети