АЙМАҚЛАРДА ЖАСЛАР МЕНЕН ИСЛЕСИЎ ДӘРЕЖЕСИ БАҲАЛАНАДЫ

8-сентябрь күни Қарақалпақстан Республикасы Жоқарғы Кеңесинде Өзбекстан Республикасы Олий Мажлиси Сенатыныӊ Жаслар, мәденият ҳәм спорт мәселелери комитетиниӊ баслығы Б.Сайфуллаев қатнасыўында Сенат тәрепинен 2021-жыл 31-июльда қабыл етилген «Жасларға байланыслы мәмлекетлик сиясаттыӊ аймақларда әмелге асырылыўы бойынша рейтинг системасын енгизиў ҳаққында»ғы қарарыныӊ мазмун ҳәм әҳмийетин түсиндириў мәселелерине бағышланған мәжилис болып өтти.

Онда Қарақалпақстан Республикасы Жоқарғы Кеӊесиниӊ депутатлары, Өзбекстан Республикасы Олий Мажлиси Сенаты жанындағы Жаслар парламенти ағзалары, халық депутатлары қалалық ҳәм районлық Кеӊеслериниӊ Социаллық-мәдений тараўды раўажландырыў, шаӊарақ, ҳаял-қызлар ҳәм жаслар мәселелери бойынша турақлы комиссиялары баслықлары, сондай-ақ, тийисли тараў басшылары ҳәмде ғалаба хабар қуралларыныӊ ўәкиллери қатнасты.

Мәжилисти Қарақалпақстан Республикасы Жоқарғы Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитети баслығы Д.Қурбаниязов ашты ҳәм алып барды.

Атап өтилгениндей, Ҳүрметли Президентимиз тәрепинен жасларға байланыслы мәмлекетлик сиясатты избе-из ҳәм нәтийжели әмелге асырыў, жасларды ҳәр тәреплеме қоллап-қуўатлаў, ҳуқықлары менен нызамлы мәплерин қорғаў системасын түп-тийкарынан реформалаў бағдарында кең көлемли жумыслар алып барылмақта.

Мәмлекетимиз басшысы тәрепинен быйылғы жылдың “Жасларды қоллап-қуўатлаў ҳәм халықтың саламатлығын беккемлеў жылы” деп жәрияланыўы, бул бойынша бир қатар қарар ҳәм пәрманлардың қабыл етилиўи буның айқын дәлили болып есапланады.

Усы жылдың 30-июнь күни – Жаслар куни мүнәсибети менен өткерилген жаслар форумында Президентимиз тәрепинен жаслар менен ислесиўдиң жәнеде жетилистириў, бул бағдарда жаңа система жаратыў бойынша әҳмийетли ўазыйпалар белгилеп берилди.

Мәмлекетимиз басшысының 2021-жыл 13-июль күнги  “Жасларды ҳәр тәреплеме қоллап-қуўатлаў ҳәм олардың жәмийетлик белсендилигин буннан былай да арттырыўға байланыслы қосымша илажлар ҳаққында”ғы пәрманында Олий Мажлис Сенатына жасларға байланыслы мәмлекетлик сиясаттың аймақларда әмелге асырылыўы бойынша рейтинг системасын енгизиў усыныс етилди.

Өзбекстан Республикасы Олий Мажлиси Сенаты тәрепинен 2021-жыл 31-июльда «Жасларға байланыслы мәмлекетлик сиясаттыӊ аймақларда әмелге асырылыўы бойынша рейтинг системасын енгизиў ҳаққында»ғы қарары қабыл етилди.

Мәжилисте Өзбекстан Республикасы Олий Мажлиси Сенатыныӊ Жаслар, мәденият ҳәм спорт мәселелери комитетиниӊ баслығы Б.Сайфуллаев Сенат қарарының мазмуны, әҳмийети, тийкарғы бағдарлары ҳәм онда белгиленген тийкарғы ўазыйпалар ҳаққында тоқталып өтти.

Қарарға муўапық, рейтинг баҳалаўдыӊ тийкарғы әҳмийетли жөнелислери белгилеп алынды, сондай-ақ, жасларға байланыслы мәмлекетлик сиясаттыӊ аймақларда әмелге асырылыўын рейтинг баҳалаў тәртиби ҳаққындағы Реже тастыйықланып, рейтинг баҳалаў бойынша Республика комиссиясы дүзилди ҳәм ўазыйпалары белгилеп берилди.

Республика комиссиясы тәрепинен жасларға байланыслы мәмлекетлик сиясаттың аймақларда әмелге асырылыўын рейтинг баҳалаўда 9 индикатор ҳәм 44 субиндикатордан пайдаланылады. Аймақлар тәрепинен рейтинг баҳалаў ушын зәрүр мағлыўматлар ҳәр шеректе Исши органга усынып барылады. Бунда аймақлар мағлыўматларды орайласқан бирден-бир электрон система (платформа) арқала аралықтан электрон формада киргизилип барылады.

Қарақалпақстан Республикасы Жоқарғы Кеңесиниң баспасөз хызмети