Социаллық шериклик бойынша жәмийетлик комиссиясының мәжилиси өткерилди

15-сентябрь күни Қарақалпақстан Республикасы Жоқарғы Кеңеси жанындағы Социаллық шериклик бойынша жәмийетлик комиссиясының мәжилиси болып өтти.

Мәжилисти Қарақалпақстан Республикасы Жоқарғы Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитети баслығы, Социаллық шериклик бойынша жәмийетлик комиссиясының баслығы Д.Қурбаниязов ашты ҳәм алып барды.

Мәжилис күн тǝртибинде Жоқарғы Кеӊес жанындағы Жәмийетлик фонд тәрепинен мәмлекетлик грант ушын жәрияланған 5-таңлаўға қабыл етилген жойбарларды комиссия мәжилисинде көрип шығыў, кейинги таӊлаўлардыӊ бағдарларын белгилеп алыў, 2022-финанс жылы ушын мәмлекетлик грант ҳәм социаллық буйыртпалар бойынша қаржы ажыратыў бойынша Қарақалпақстан Республикасы Министрлер Кеӊеси ҳәм Финанс министрлигине усыныслар киргизиў, сондай-ақ, 2021-жылдыӊ июнь айында мәмлекетлик грантлар бойынша жәрияланған биринши ҳәм екинши таӊлаўларға ажыратылған грант қаржылары бойынша мониторинг өткериў мәселелери қарап шығылды.

 

Қарақалпақстан Республикасы Жоқарғы Кеңеси жанындағы жәмийетлик фонд тәрепинен 2021-жылдың 27-июльдан 27-августқа шекемги мүддет аралығында мәмлекетлик грант ушын жәрияланған 5-таӊлаўына 5 жойбар келип түсти.

Жойбарлар ҳаққында Социаллық шериклик бойынша жәмийетлик комиссияның бағдарлама ҳәм жойбарлардың социаллық ҳәмде улыўма әҳмийетин анықлаў бойынша исши топар ағзасы Қ.Бекбаўлиев кеӊнен түсиник берди.

Мәжилисте усы жойбарлар қаралып, олардыӊ мазмуны, тийкарғы мақсетлери, әмелге асырыў механизмлери ҳәм күтилип атырған нәтийжелери додаланды.

Мәжилисте Жǝмийетлик фонд тǝрепинен мǝмлекетлик грант ушын жәрияланатуғын кейинги таӊлаўлардыӊ бағдарлары белгилеп алынды. Сондай-ақ, мәжилис күн тǝртибиндеги басқа мәселелер көрип шығылып,  комиссия ағзалары өзлериниӊ пикир ҳəм усынысларын билдирди.

Қарақалпақстан Республикасы Жоқарғы Кеңесиниң баспасөз хызмети