Халықаралық бақсышылық  көркем өнери фестивалының ашылыў мәресими болып өтти

Пайтахтымызда II Халықаралық бақсышылық  көркем өнери фестивалы басланды. Амфитеатрда фестивальдың салтанатлы ашылыў мәресими өткерилди.

20 дан аслам мәмлекеттен келген көркем өнер шеберлери қатнасыўы күтилип атырған  фестивалдың ашылыў мәресиминде Өзбекстан Республикасы Сенаты ағзалары, Министрлер Кабинети ўәкиллери, министрлик ҳәм шөлкемлер басшылары, Жоқарғы Кеңес депутатлары, ҳүкимет ағзалары, фестиваль қатнасыўшылары қатнасты.

Президентимиздиң Халықаралық бақсышылық көркем өнери фестивалына жоллаған қутлықлаўын Өзбекстан Республикасы Бас министриниң орынбасары А.Абдуҳакимов оқып еситтирди.

Буннан соң елимизге белгили көркем өнер шеберлери атқарыўында концерт бағдарламасы өткерилди. Ҳәр бир аймақтың миллий өзгешелигин билдириўши көргизбели шығыўлар, йошлы қосықлар менен аяқ ойынлар бәршеге бирдей қуўаныш бағышлады.