ҚАРАҚАЛПАҚСТАН РЕСПУБЛИКАСЫ ЖОҚАРҒЫ КЕҢЕСИНИҢ ЖИГИРМА ЕКИНШИ СЕССИЯСЫ ҲАҚҚЫНДА МӘЛИМЛЕМЕ

6-октябрь күни Қарақалпақстан Республикасы Жоқарғы Кеңесиниң жигирма екинши сессиясы болып өтти.

Видеоконференцбайланыс тәризинде өткен сессияға Өзбекстан Республикасы Олий Мажлиси Сенаты, Қарақалпақстан Республикасы ҳүкимети ағзалары, секторлардың ҳәм тараўлардың басшылары, ғалаба хабар қуралларының ўәкиллери, сондай-ақ, Жоқарғы Кеңестиң депутатлары қала ҳәм район студияларында қатнасты.

Сессияны Қарақалпақстан Республикасы Жоқарғы Кеңесиниң Баслығы М.Камалов кирис сөз бенен ашты ҳәм басқарып барды.

Депутатлар сессияның Секретариатын сайлады ҳәм күн тәртибин тастыйықлады.

Сессия мәжилиси күн тәртибиндеги дәслепки мәселе, яғный «Фирма атамалары ҳаққында»ғы Қарақалпақстан Республикасы Нызамының жойбары туўралы Қарақалпақстан Республикасы Жоқарғы Кеңесиниң Нызамлылық, суд-ҳуқық ҳәм коррупцияға қарсы гүресиў мәселелери бойынша комитет баслығы З.Реймова баянат жасады.

Бул мәселе бойынша 48-санлы “Жиңишке” сайлаў округинен Жоқарғы Кеңес депутаты Ш.Отемисов сөзге шықты.

Депутатлар бул мәселе бойынша тийисли қарар қабыл етти.

Сессияда «Майыплығы болған шахслардыӊ ҳуқықлары ҳаққында»ғы Қарақалпақстан Республикасы Нызамының жойбары туўралы мәселе көрип шығылды. Бул мәселе бойынша Қарақалпақстан Республикасы Жоқарғы  Кеңесиниң Социаллық-мәдений раўажланыў ҳәм жәмийетлик бирлеспелер мәселелери комитети баслығы Д.Қурбаниязов баянат жасады.

Бул мәселе бойынша 61-санлы “Бозжап” сайлаў округинен Жоқарғы Кеңес депутаты Б.Айтеков сөзге шықты.

Депутатлар бул мәселе бойынша тийисли қарар қабыл етти.

Сессия күн тәртибинде «Қарақалпақстан Республикасы ҳәкимшилик суды баслығын сайлаў ҳаққында»ғы мәселе көрип шығылды.

Қарақалпақстан Республикасы Конституциясы ҳәм «Судлар ҳаққында»ғы Өзбекстан Республикасы Нызамы талапларына муўапық, Нурлипесов Амир Отеповичти Қарақалпақстан Республикасы ҳәкимшилик судының баслығы етип сайлаў ҳаққындағы  Қарақалпақстан Республикасы Жоқарғы Кеңеси Баслығының усыныснамасы депутатлардың итибарына усынылды.

Бул мәселе бойынша депутатлар тийисли қарар қабыл етти – Нурлипесов Амир Отепович Қарақалпақстан Республикасы ҳәкимшилик судының баслығы лаўазымына сайланды.

Сондай-ақ, сессияда «Тәбийий газ қадағалаўы ҳәм есабының автоматластырылған системасын шөлкемлестириў» жойбарын әмелге асырыў барысында алып барылып атырған жумыслар хаққында “Ҳудудгазтаъминот” акционерлик жәмийети “Ҳудудгаз Қарақалпақстан” газ тәмийинаты филиалы баслығының есабаты туўралы”, “Қарақалпақстан Республикасында туризмди раўажландырыў бойынша 2021-жылда әмелге асырылған илажлар ҳаққында Қарақалпақстан Республикасы Туризм ҳәм спорт бас басқармасы баслығыныӊ есабаты туўралы”, “Халықтыӊ саламатлығын беккемлеў бойынша алып барылып атырған илажлар ҳаққында Қарақалпақстан Республикасы Денсаўлықты сақлаў министриниӊ есабаты туўралы”, “2030-жылға шекемги болған дәўирде Өзбекстан Республикасының қоршаған орталықты қорғаў концепциясында белгиленген ўазыйпалардың 2019-2021-жылларда Қарақалпақстан Республикасында әмелге асырылыўы бойынша Қарақалпақстан Республикасы Экология ҳәм қоршаған орталықты қорғаў комитети баслығының мәлимлемеси туўралы”,  “Қарақалпақстан Республикасы Жоқарғы Кеңеси Президиумының тийисли қарарларын тастыйықлаў туўралы” мәселелер көрип шығылып, бул бойынша депутатлар тийисли қарар қабыл етти.

 

Усының менен Қарақалпақстан Республикасы Жоқарғы Кеңесиниң жигирма екинши сессиясы өз жумысын жуўмақлады.

Қарақалпақстан Республикасы Жоқарғы Кеңесиниң баспасөз хызмети

М.Ҳабибуллаев түсирген сүўретлер