ЖОҚАРҒЫ КЕҢЕС БАСЛЫҒЫ НУРАНЫЙЛАРДЫ СЫЙЛЫҚЛАДЫ

Елимизде “Кекселерди қәдирлеў, оларға ҳүрмет-иззет көрсетиў – халқымызға тән уллы пазыйлет” деген идеяны өзинде жәмлеген “Кекселер ҳәптелиги” өткерилмекте.

Ҳәптелик даўамында елимиздеги барлық нураныйлар, жалғыз жасаўшы, майыплығы болған кекселер, 100 жастан асқан теберик нураныйлар, Екинши жер жүзилик урысы қатнасыўшылары ҳәм мийнет ветеранлары, сақаўат ҳәм мириўбет үйинде жасап атырған кекселер ҳалынан хабар алынып, оларға итибар көрсетилип, ҳәр түрли мәдений, қайырқомлық илажлары, ушырасыўлар өткерилмекте.

Ҳәптелик шеңберинде 7-октябрь күни пайтахтымызда нураныйлар ушын байрам дәстурханы жайылды.

Онда жәмийетимиздиң түрли тараўларында мийнет еткен, елимиздиң раўажланыўына өз үлесин қосқан, бүгинги күнде өзиниң турмыслық тәжирийбесин жасларға үйретип киятырған белсенди нураныйларымыз ҳәм жаслар қатнасты.

Илажда Қарақалпақстан Республикасы Жоқарғы Кеңесиниң Баслығы М.Камалов қатнасты ҳәм Қарақалпақстан Республикасы Жоқарғы Кеңеси Президиумының арнаўлы қарарына муўапық бир топар нураныйларымызды “Ардақлы нураный” ҳәм “Ўатан пидайысы” көкирек белгилери менен сыйлықлады.

Илажда Қарақалпақстан көркем-өнер шеберлери қатнасыўында концерт бағдарламасы қойып берилди.

Қарақалпақстан Республикасы Жоқарғы Кеңесиниң баспасөз хызмети