1

ЕРКИНЛИГИМИЗ, АБАДАН ҲӘМ БАХЫТЛЫ ТУРМЫСЫМЫЗ ТЫМСАЛЫ

Пайтахтымыздағы Амфитеатрда елимиз ғәрезсизлигиниң 30 жыллығына бағышланған «Жаңа Өзбекстанда еркин ҳәм абадан жасайық!» сүрени астында байрам салтанаты болып өтти.

Онда Өзбекстан Республикасы Олий Мажлиси Сенаты ағзалары, Қарақалпақстан Республикасы Жоқарғы Кеңесиниң депутатлары, ҳүкимет ағзалары, сектор басшылары, министрлик ҳәм шөлкемлер, кең жәмийетшилик ўәкиллери, ғалаба хабар қураллары хызметкерлери қатнасты.

Салтанатлы илажды Қарақалпақстан Республикасы Жоқарғы Кеңесиниң Баслығы М.Камалов ашып, гүллән халқымызды ең уллы, ең муқаддес байрам – елимиз ғәрезсизлигиниң 30 жыллық байрамы менен шын кеўилден қутлықлады.

Атап өтилгениндей, елимизде Хурметли Президентимиз басшылығында өткен қысқа ўақыт ишинде барлық аймақлар қатарында Қарақалпақстанда да кең көлемли реформалар әмелге асырылып, елимизди социал-экономикалық жақтан раўажландырыўға айрықша итибар қаратылмақта.

Соңғы бес жылда елимизде киши бизнес ҳәм исбилерменлик, санаат, хызмет көрсетиў ҳәм аўыл хожалығы тараўларында бир қатар инвестициялық жойбарлар әмелге асырылды. Буның нәтийжесинде халқымыз ушын жаӊа жумыс орынлары жаратылып, бир қатар ири өндирис кәрханалары, көплеген социаллық объектлер иске түсти.

Халқымызды социаллық жақтан қоллап-қуўатлаў мақсетинде “Темир дәптер”, “Ҳаяллар дәптери”, “Жаслар дәптери” жолға қойылды.

Жаслардың бәнтлигин тәмийинлеў, оларды кәсип-өнерге ҳәм исбилерменликке үйретиў, ҳәр тәреплеме қоллап-қуўатлаў, олардың қәбилетин жүзеге шығарыў бағдарында бир қанша илажлар әмелге асырылмақта.

Өз нәўбетинде жасларымыз бундай итибар ҳәм ғамқорлыққа жуўап ретинде ҳәр түрли тараўларда жоқары табысларды қолға киргизбекте.

Атап айтқанда, жақында Японияда болып өткен Олимпия ойынларында 4 спортшымыздың қатнасқаны, бир қатар жасларымыздыӊ мәмлекетлик сыйлықлар менен сыйлықланғаны буның айқын дәлили болып есапланады.

…Өзбекстан ҳәм Қарақалпақстан Республикалары мәмлекетлик гимнлери атқарылды.

Илажда Олимпия ойынларында қатнасқан спортшыларымыз ҳəм олардың тренерлерине Қарақалпақстан Республикасы Жоқарғы Кеңеси Президиумының қарарына муўапық, ҳүрметли атақлар, сондай-ақ, спортшыларға Қарақалпақстан Республикасы Жоқарғы Кеңеси тәрепинен пул сыйлықлары тапсырылды.

Салтанатлы байрам илажы концерт бағдарламасы менен даўам етти. Бағдарламадан орын алған көркем өнер шеберлери ҳәм жас талант ийелери атқарыўындағы Ўатан, дослық, тынышлық ҳәм татыўлық, жаслық ҳақкындағы қосықлар ҳәм аяқ ойынлар жыйналғанларға көтериңки кейпият бағышлады.

 Қарақалпақстан Республикасы Жоқарғы Кеңесиниң баспасөз хызмети