Nókiske 32 jańa avtobus alıp kelinedi

Ózbekstanda transport tarawın izbe-iz modernizaciyalaw jumısları dawam etpekte. Ámelge asırılıp atırǵan reformalar sheńberinde jolaǵshılar tasımalı xızmetiniń sapasın jaqsılaw hám xalıq ushın qolaylı sharayat jaratıwǵa ayırım itibar berilmekte.

Usı maqsette «FAYZ AVANGARD» JShJ tárepinen satıp alınǵan 32 jańa avtobus Nókis qalasına alıp kelinedi. Avtoparktı jańalaw nátiyjesinde jolaǵshılarǵa xızmet kórsetiw sapası jaqsılanıp, qalalıq jámiyetlik transporttıń jumısı jetilistiriledi hám qatnawlar bıraz qolaylı boladı.

Ayta ketiw kerek, Ózbekstan Respublikası Prezidentiniń jámiyetlik transport sistemasın rawajlandırıwǵa qaratılǵan qararlarına muwapıq, elde brutto-kontrakt sisteması engizilmekte. Bul sistema boyınsha tasıwshılarǵa tólem tasılǵan jolaǵshılar sanına emes, al orınlanǵan transport jumısınıń (jürilgen aralıqtıń) kólemi hám kórsetilgen xızmettiń sapasına qarap belgilenedi.

Jańa avtobuslar Nókis qalasınıń qalalıq marshrutlarında dás sol sistema tiykarında xızmet kórsetedi. Bul qatnawlardıń turaqlılıǵın arttırıwǵa, transport xızmetiniń sapasın jaqsılawǵa hám jolaǵshılar ushın qolaylılıqtı kúsheytiwge xızmet etedi.