Жоқарғы Кеңес Баслығы тәрепинен "Жаслар дәптери"не киргизилген 353 жигит-қызларға субсидия тийкарында 1 млрд. 800 млн. сум муғдарындағы әсбап-үскенелер топламы тапсырылды
1844
Ҳүрметли Президентимиздиң басламасы менен жасларды социаллық жақтан қоллап-қуўатлаў, оларды исбилерменликке тартыў арқалы бәнтлигин тәмийинлеў мақсетинде бир қатар жумыслар әмелге асырылмақта. Соннан, 2021-жылдан баслап жаслардың социаллық-экономикалық машқалаларын анықлаў ҳәм оларды шешиў мақсетинде "Жаслар дәптери" системасы енгизилди. Усы тийкарда Төрткүл районында бүгинги күнге шекем 6903 жас "Жаслар дәптери"не киргизилип, ҳәр тәреплеме қоллап-қуўатланбақта.
Жаслардың социаллық-экономикалық машқалаларын анықлаў ҳәм оларды сапластырыў мақсетинде "Нөкис тәжирийбеси" тийкарында 2022-жыл декабр айында райондағы 37 мәҳәлледе 52 197 жаслар үйме-үй жүриў арқалы хатлаўдан өткерилип, соннан 788 жасты "Жаслар дәптери"не киргизиў бойынша усыныс етилди. Бүгин Қарақалпақстан Республикасы Жоқарғы Кеңесиниң Баслығы Аманбай Орынбаев тәрепинен "Жаслар дәптери"не киргизилген 353 жигит-қызларға өзлериниң қәлеўи бойынша субсидия тийкарында 1 млрд 800 млн сўмлық 490 топлам, соннан, 166 тигиў машинасы, 50 кондитер печ ҳәм миксер, 31 мотокултиватор ҳәм қурылыс әсбап-үскенелери тапсырылды.
Айтып өтиў орынлы, жасларды ҳәр тәреплеме қоллап-қуўатлаў, олардың бәнтлигин тәмийинлеў, социаллық жағдайын жақсылаў бағдарындағы әмелге асырылып атырған жумыслар республикамыз бойынша даўам еттирилмекте.
Қарақалпақстан Республикасы Жоқарғы Кеңесиниң Мәлимлеме хызмети