Нөкис районы аймағында аўыл хожалығы өнимлерин экспортқа бағдарлаў менен шуғылланыўшы жаңа жойбар иске түсирилди

Бугин Нөкис районы Қрантаў аўыл пуқаралар жыйыны, Шортанбай халық жасаў пунктинде жайласқан “BIOGUMUS” фермер хожалығы тәрепинен әмелге асырылып атырған “Қуяшта қурғатылған экологиялық таза (органикалық) помидорды қайта ислеўди кеңейтиў ҳәм модернизациялаў” стартап жойбарының ашылыў мәресими болып өтти. Онда Қарақалпақстан Республикасы Жоқарғы Кеңеси Баслығының орынбасары Р.Сапарбаев шығып сөйлеп, жаңа жойбардың алдағы жумысларында табыслар тиледи.

  Атап өтиў керек, кәрханаға Өзбекстан Республикасы Президентиниӊ 2022-жыл 6-июльдағы “2022-2026-жылларда Өзбекстан Республикасыныӊ инновациалық раўажландырыў стратегиясын әмелге асырыў бойынша шөлкемлестириў ис-илажлары ҳаққындағы” ПҚ-307-санлы қарарына муўапық,  Қарақалпақстан Республикасы Инновациалық раўажландырыў басқармасы тәрепинен 1млрд 100 млн сум қаржы ҳәм исбилерменниң өз қаржылары ажыратылып, жаңа жойбар жумысы жолға қойылды.

  Айтып өтиў орынлы, бүгинги күнде жойбар шеңберинде жаңа имарат қурып питкерилген болып, 124 мың АҚШ доллары муғдарында күнине 30 мың дана қадақлаў қуўатлылығына ийе жоқары технологиялы ҳәм энергия тежеўши әсбап-үскенелер алып келинди. Сондай-ақ, жойбар шеңберинде 20 турақлы ҳәм 70 мәўсимлик жумыс орынлары жаратылды. Кәрханада қурғатылған мийўе-палыз өнимлери, ғоза, бадам сыяқлы бир қатар мийўелерди қадақлаў ҳәмде экспортқа бағдарлаў режелестирилген. Сондай-ақ, кәрхана имаратында жайласқан 300 ҳәм 70 тоннаға мөлшерленген музлатқышта мийўе-палыз ҳәм баў-бақша өнимлерин сақлаў имканияты жаратылған. Жергиликли өним жетистириў менен шуғылланыўшы фермер ҳәм дыйқан хожалықлары усы орында өз өнимлерин сақлаў ҳәм экспортқа бағдарлаў имканиятына ийе болады. Ҳәзирги ўақытта 10 түрли өним Қытай, Франция, Израйл ҳәм Япония мәмлекетлерине экспортқа шығарылыў алдында тур.

 

Қарақалпақстан Республикасы Жоқарғы Кеңесиниң Мәлимлеме хызмети